„Tip of the Week“ се авторски текстови што се објавуваат секој четврток и обработуваат теми од секојдневниот живот коишто помогат да го подобрите вашето лично и професионално работење.Коментарите за совети, можете да ги пишувате на: www.facebook.com/tipoftheweekPriracnik Како сублимат на првите 100 совети издадени се единствените прирачници за личен и професионален развој.
Не е важно која е компанијата или чија е, наградите кои ги има добиено, големината, локацијата или достигнувањата, сепак може да се случи нешто да не е во ред со таа компанија. Живееме во многу турбулентно време, време опкружено со непредвидливи ситуации, па моментот кога нешто не е во ред, може да дојде многу неочекувано.
Од друга пак страна, реалноста не е баш лесна за прифаќање, па одговорите на прашањата не е лесно да се донесат:
- Кога нешто не е во ред?
- Дали тоа можеме сами да го заклучиме или треба некој од надвор да ни каже?
- Кога е време за предупредување?
Време е за предупредување кога некои од следниве работи/знаци почнуваат да се честа појава во вашата компанија или траат веќе подолго време:
- Немотивирани луѓе – кога луѓето едвај доаѓаат на работа или остануваат до многу доцна или имаат премногу време за „дрдорење” и глупи муабети или, пак, работат работи кои не се поврзани со нивната работа, тоа е знак дека нешто не е во ред.
- Промена на кадар – ако голем број луѓе си одат од компанијата, тоа значи дека го напуштаат бродот што тоне. Никој не сака да остане последен!
- Квалитет – квалитетот на производите и услугите што ги нудите е намален. Намалување на квалитетот ќе го увидите со тоа што или има зачестени поплаки или никој не ве бара, едноставно продажбата ви „паѓа“.
- Лидерство – рибата смрди од главата, па така и во вашата компанија. Лидерство без интегритет, мотивираност и чесност, а од друга страна, постојана критика и не е лидерство. Критиката е добра, но ако менаџментот само критикува и чека само момент за да критикува, тогаш не ѝ се пишува добро на компанијата со такви лидери.
- Комуникација – да не кажам НУЛА комуникација. Има недостиг на разбирање и никој не ја знае „вистинската”, вистина што доведува до комуникација која се сведува на озборување и други муабети кои не се поврзани со работа. Ова води кон чувство на страв, вознемиреност и нервоза на вработените, со што се забрзуваат озборувања и „приказни" за тоа што може или ќе се случи во рамките на организацијата. Ова води кон конфузија, стрес и голема несреќа.
- Финансии – не сте во можност веќе подолго време да ги исплатите долговите, ниска профитабилност, неможност да дојдете до пари, дали од банка или некое друго место...
- Тензии помеѓу одделенијата – во повеќе компании има тензии меѓу секторите, но таа тензија може да е позитивна (ако ја сведете на мотивирачка конкуренција) или негативна (омраза и несподелување на инфо помеѓу секторите, што доведува до намалување на продажба или доцнење на испораки или лоша комуникација со надворешниот свет).
- Фокус на окривување – ако е фокусот на „покажување со прст“ на тоа кој е крив и кој не ја завршил добро работата, наместо прифаќање на грешките и учење од нив, тогаш нешто не е во ред.
Имајте ги предвид овие знаци, така што кога следниот пат некој од нив ќе се појави, да знаете дека е време за размислување и длабинска анализа, дали или не да се почне со некои промени за успех во вашата компанија, но и на сите во компанијата.
Со успех во промените
@kalinbabusku
Член на тимот
МАКЕДОНИЈА-ЕКСПОРТ Консалтинг
www.macedonia-export.com
Доколку сакате текстовите да ги добивате на Вашата е-пошта или мислите дека некои Ваши колеги, соработници и пријатели треба да ги добиваат овие текстови, испратете ни ја/ги на tow@macedonia-export.com
