Енди Брит е постар партнер во IBM и ја предводи практиката на IBM за трансформација на европски таленти, обезбедува менаџмент со човечкиот капитал, HR и регрутерски аутсорсинг и советник за менаџмент со организациски промени за клиенти.
Преку ова интервју Ви го претставуваме Енди Брит (Andy Britt), еден од клучните говорници на 13. Меѓународна HR Конференција во организација на МАЧР, која ќе одржи на 21 и 22 октомври 2021 година (во онлајн формат).
На WOWHR GLOBAL CONFERENCE, која се одржа на 15 јули, Вие одржавте презентација/предавање на тема „How artificial intelligence is reinventing HR, skills and the employee experience“. Дали можете да ни кажете како ќе влијае вештачката интелигенција (AI) врз човечките ресурси и каде ќе има најголемо влијание?
Вистинската вредност и потенцијал на вештачката интелигенција лежи во неговата способност да ни го олесни животот. Во светот каде што сè околу нас е преоптоварено со податоци и со информации, вештачката интелигенција има способност да апсорбира и да им даде смисла на податоците што нè бомбардираат секојдневно. Тие велат дека „животот е полн со избори“. Како што навлеговме во третата декада на 21. век, гледаме дека добро дизајнираната вештачка интелигенција може да ни помогне да донесеме подобри одлуки или поинформиран избор – со анализа на огромни сетови податоци и со формирање препораки, или барем хипотези, за тоа каква акција би можело да се преземе.
Зошто е ова добро за човечките ресурси? Прво, затоа што животот е комплициран – и за многумина од нас може да биде стресен! Во многу организации со кои работам, веќе имаме разговори за менталното здравје и за благосостојбата на работното место, што никогаш не сме ги правеле порано. Сфаќаме колку е важно да се грижиме за менталното и за емоционалното здравје на нашите луѓе. Вештачката интелигенција тука може да помогне со создавање клима на избор и со донесување одлуки што потенцијално ќе направи процесите да се одвиваат многу поедноставно. Вештачката интелигенција може да ни даде увид и препораки околу тешките одлуки што треба да ги носиме секој ден во нашиот работен живот – и едноставно да го направи животот помалку „комплициран“.
Второ, вештачката интелигенција ќе се користи во целиот животен циклус на вработените за да ни помогне да донесуваме попаметни одлуки за луѓето. Како професионалци за човечки ресурси се гордееме со развиеното чувство на проценка, искуство и мудрост осознаена преку работа со луѓе за донесување на одлуки за човечките ресурси; во иднина тие одлуки ќе бидат зајакнати со сознанија базирани на податоци што ќе ги донесе вештачката интелигенција. HR ќе стане наука, користејќи прецизност и корелација, за да помогне во информирањето на критичните одлуки што ги преземаме за да му помогнеме на бизнисот да напредува. Земете на пример процес на вработување; просечниот тим за вработување може да добие 30-50 биографии за секој објавен оглас за работа. Тоа се многу биографии за читање и проценка.
Денес, алатките за скрининг на вештачката интелигенција можат веднаш да скенираат и да анализираат стотици биографии за неколку секунди, идентификувајќи ја усогласеноста помеѓу вештините/искуството на кандидатот и огласената работна позиција. Вештачката интелигенција потоа може да ги рангира или да даде приоритет на кандидатите во однос на нивната соодветност за позицијата, па дури и да идентификува кандидати кои би можеле да бидат соодветен избор за културата на организацијата. Најважно, овие алатки за скрининг на вештачката интелигенција се транспарентни за критериумите или за алгоритмите што се користат за рангирање на кандидатите – и дури можат да покажат дали има абнормална пристрасност кон одреден пол, етничка група или возрасна категорија.
Слично на тоа, на другиот крај од животниот циклус на вработените, вештачката интелигенција може да ги анализира множествата податоци за тоа кој ја напушта компанијата и да нагласи какви промени се појавиле во стапките на заминување на вработените; ова може да биде енормно корисно за менаџерите. Во IBM корпорациите сега можеме да ги идентификуваме оние клучни вработени кои се со најголем ризик од напуштање на работното месо – како и да им дадеме насоки на менаџерите за тоа кои мерки за задржување најверојатно ќе ги убедат да останат. На сличен начин, ние користиме вештачка интелигенција и аналитика за да препорачаме зголемување на платата што треба да им ја даваме на вработените секоја година – не само врз основа на нивните перформанси, туку и гледајќи ги нивните вештини, побарувачката за тие вештини, просечната компензација на пазарот и нивниот иден потенцијал.
Ваквото ниво на увид што го дава вештачката интелигенција помага HR да стане наука, функција базирана на увид, а не само да се потпира на минатото искуство и професионално расудување.
Како ја гледате улогата на менаџментот со човечките ресурси (HRM) во организациите во следната година (2022)?
Улогата на HR во следната година ќе биде многу фокусирана на развивање и спроведување на стратегија на компанијата по пандемијата со Ковид 19. Во зависност од нарушувањето што го имаше „Ковид“ во вашата индустрија, очекувам професионалците за човечки ресурси да помогнат во обликувањето на:
- Планирање на потребната работна сила и вештини – каква треба да биде големината и обликот на нашата работна сила додека излегуваме од „Ковид“? Какви нови вештини ќе ни требаат во следните 12 месеци – и каква рамнотежа на развивање (т.е. развој на таленти) и донесување нови таленти (стекнување таленти) треба да користиме за брзо да ги најдеме тие вештини?
- Увид во работната сила – какви сознанија можеме да добиеме од податоците на нашите луѓе што ќе ни помогнат да излеземе посилни од пандемијата? Кои се најдобрите изведувачи и зошто? Какво учење или развој најверојатно ќе ги подобри нашите деловни резултати? Каде се нашите критички таленти и каква е нивната веројатност за напуштање на работното место?
- Благосостојба – како можеме да создадеме вистинска култура, работни политики и практики што го прават безбедно место за работа на луѓето? Како да им помогнеме на нашите луѓе да се пронајдат и да го дадат најдоброто од себе во нашата компанија?
- Работно место – како да создадеме добра работна средина – дали дома, канцеларија, фабрички погон, продавница? Што е безбедно место за нашите вработени? Ако продолжи процесот на хибридната работа, тогаш како да се осигураме дека тоа одговара за сите вработени?
Нашата 13. Меѓународна HR Конференција, која ќе се одржи на 21 и 22 октомври 2021 година се фокусира на преплетување (intertwining) помеѓу хуманоста и технологијата. Дали вештачката интелигенција (AI) може да биде јадрото на HR иднината и како можеме да го комбинираме со хуманата (човечката) компонента?
Интересно е колку од нашите мислења за вештачката интелигенција се формирани од Холивуд! Практично секој филм со вештачки интелигентни машини или роботи го следи истиот заговор – без разлика дали се работи за Blade Runner, Terminator, iRobot или 2001 A Space Odyssey – во суштина се прикажани како опасна и заканувачка идна иновација. Вештачката интелигенција, секако, носи со себе одредени ризици и неизвесности – но како професионалци за човечки ресурси треба да сфатиме дека сè повеќе ќе станува дел од нашиот секојдневен живот. Треба да се подготвуваме за иднина каде што треба да управуваме со човечка работна сила и виртуелна работна сила (без разлика дали тоа значи автоматизација на роботски процеси или физички роботи кои преземаат рутински или механистички задачи). Вештината овде е да се разбере каде луѓето работат најдобро и каде вештачката интелигенција или роботиката носат најголема вредност. На пример, како луѓе, ние природно поседуваме вештини и атрибути како креативност, дизајн, емпатија и слушање – тие се основни за она што значи да се биде човек. Машините или вештачката интелигенција, од друга страна, се природно прилагодени за пресметковни или аналитички задачи и не им станува здодевно од повторување на истите трансакции повеќе пати. Начинот на кој треба да се планира иднината и интеракцијата помеѓу човекот и машината е да се подели обемот на работа – да се делегираат (или автоматизираат) рутинските, повторувачки или сложени задачи и вработените да се фокусираат на активностите за кои е потребно посуптилно донесување одлуки, емпатија или оние кои бараат таква креативност или внимателно разгледан дизајн. Ако го сфатиме ова правилно, можеме да ја ослободиме нашата работна сила од монотоните задачи што ја трошат нивната енергија и страст и да ги пренасочиме на работа што е попривлечна и поттикнувачка.
По што сакате да бидете запаметени во HR заедницата?
Живееме во време кога брзо се менуваат работите. Светот на работа и улогата на човечките ресурси ќе се сменат повеќе во следните 3 години отколку што се промениле во последните 30 заедно. Сакам да останам запаметен како консултант кој им помогна на професионалците за човечки ресурси да се подготват за иднината – помагајќи им да размислат и сфатат како човечките ресурси може да се управуваат поефикасно со оглед на појавата на новата технологија – и воедно да не се плашат од експериментирање и учење за тоа како може да се користат најдобрите технологии како што се вештачката интелигенција и автоматизацијата на процесите.
Исто така, сакам да бидам запаметен како лидер кој гарантираше дека човештвото е во срцето на секоја организација и јас ја играм својата улога за да создадам култура на компанија каде што луѓето напредуваат – интелектуално и емоционално – додека ги вложуваат своите вештини, таленти, личност и страст работа секој ден.
Сакам да бидам запаметен како лидер кој можеше да слуша – и кој ги охрабри другите да слушаат – што е почетна точка за сите врски (во животот, како и во бизнисот.)
Дали имате некоја порака која сакате да ја испратите до mакедонската публика?
Ова е возбудливо време да се биде во човечките ресурси. Пандемијата ги потсети сите бизниси (и општеството) на важноста на луѓето; HR сега е критична точка во агендата на менаџментот на компаниите. Значи, како професионалци за човечки ресурси треба да ја искористиме можноста и да покажеме како вештините и ангажманот на нашата работна сила се клучни за успехот. Треба да гледаме на иднината – треба нашите организации да разберат и предвидат какви вештини ни се потребни во иднина и како да ги охрабриме сите во организацијата да бидат посветени на континуирано учење. Ни треба нашите вработени да станат пољубопитни и да инвестираат во себа, односно да бидат посветени на учење нови вештини и совладување на нови компетенции за да останат релевантни на пазарот. Ова е причината зошто професионалците за човечки ресурси ќе бидат толку важни за опстанокот и здравјето на компаниите каде што работат.
Нашите неодамнешни истражувачки трудови на IBM ефикасно ги доловуваат овие точки:
- HR3.0
https://www.ibm.com/thought-leadership/institute-business-value/report/hr-3
- Водич за претпријатија за затворање на јазот на вештини
https://www.ibm.com/thought-leadership/institute-business-value/report/closing-skills-gap
Оригиналната верзија на интервјуто со Енди Брит на англиски јазик, можете да ја погледнете на следниов линк:
https://drive.google.com/file/d/1YIoI9TUUNtPLg2vgptYjiOM_JbjtuRCF/view?usp=sharing
