Меѓународните патувања ќе се зголемат во 2022-ра година, но сепак нема да можат да се опорават на нивоата од 2019-та година, пред пандемијата. Главната тешкотија ќе бидат различните практики на гранична контрола поради вирусот и разликите меѓу пасошите за вакцинација.
Ова се наведува во извештајот за туристичкиот сектор подготвен од „Economic Intelligence Unit“.
Усогласеноста со климатските промени, како и повисоките цени на горивото и платите, ќе ги зголемат трошоците за авионски патувања во 2022-ра година. Ова на крајот ќе доведе до спојување на авиокомпании, затворање аеродроми и повисоки цени на билетите, предвидуваат економистите.
Подобрата дистрибуција на вакцините против коронавирусот во развиените земји отвори некои граници, но нивото на патување пред пандемијата нема да се достигне во 2022-ра година, се вели во извештајот.
Потиснатите службени патувања
Глобалните меѓународни пристигнувања во 2022-ра година ќе останат 30% под нивоата од 2019-та година. Азискиот пазар ќе закрепне најбавно од пандемијата, при што меѓународните патувања во регионот ќе бидат 39,5% под оние пријавени во 2019-та година.
Северна Америка ќе закрепне најбрзо во однос на меѓународните патувања, но повторно бројот на патници ќе биде 29% под пријавениот во 2019-та година.
Европа, Блискиот Исток и Северна Африка ќе имаат слични траектории за опоравување за меѓународните пристигнувања, 31% и 33% под нивото од 2019-та година, соодветно.
Меѓународниот туризам во 2022-ра година ќе биде стимулиран од големи настани како „Dubai Shopping Festiva“l (DSF) и „Expo 2020“, се вели во извештајот на „EIU“. Сепак, деловните патувања ќе останат потиснати бидејќи компаниите избегнуваат да ги изложуваат своите вработени во ризик и сакаат да ги минимизираат трошоците и емисиите на јаглерод.
Тестови, маски, пасоши за вакцинација
Патувањето ќе остане многу поинакво искуство во светот по пандемијата на коронавирусот. Тестирањето и некоја форма на карантин ќе продолжат да се применуваат. Носењето маски на јавни места ќе биде вообичаено и во 2022-ра година. Пасошите за вакцини ќе станат уште почести. Сепак, нивниот успех ќе зависи од постигнатото ниво на интероперабилност, велат економистите.
Повеќето земји прифаќаат само вакцини кои се одобрени од нивниот сопствен здравствен регулатор или Светската здравствена организација (СЗО). Дополнително, пасошите за вакцини мора да бидат компатибилни со системите за резервација и управување со авиокомпании, како и со сите дигитални сертификати и тестови за вакцини воведени од владите и давателите на здравствена заштита ширум светот. Недостигот на усогласени правила ќе го попречи закрепнувањето на меѓународниот туризам, се вели во извештајот.
Домашен туризам
Домашниот туризам ќе донесе одредено олеснување на притисокот врз туристичкиот сектор. Веќе се прават подобрувања во домашните резервации на големите пазари како што се САД и Кина, како и приходите во хотелскиот сектор.
„EIU“ очекува глобалните потрошувачки трошоци за хотели и ресторани да пораснат за 5,3% во 2022-ра година, што ќе ги доближи до нивоата пред пандемијата.
Домашниот туризам во Кина ќе има корист од Зимските олимписки игри во Пекинг, закажани за февруари 2022-ра година. Сепак, појавата на нова верзија на коронавирусот претставува ризик за настанот.
Регулацијата на климата ги зголемува трошоците
Во 2022-ра година, компаниите од туристичката индустрија ќе бидат предмет на зголемена контрола од страна на регулаторите, потрошувачите и инвеститорите за да се искорени или барем да се минимизира нивниот придонес во климатските промени.
Од авиокомпаниите ќе се бара да ги намалат емисиите според Меѓународната шема за компензација и намалување на воздухопловството, која ќе биде подложена на првиот тригодишен преглед во ноември 2022-ра година.
Очекуваме емисиите на авиокомпаниите да останат под основната линија во 2022-ра година поради помалата побарувачка за меѓународни патувања, што ќе им заштеди од трошоците за неутрализирање на емисиите на јаглерод во време кога цените на јаглеродните кредити растат.
Сепак, усогласеноста со шемата ќе продолжи да ги зголемува оперативните трошоци, особено бидејќи цените на горивото (кои сочинуваат околу една четвртина од нивните вкупни трошоци) ќе продолжат да растат во 2022-ра година.
Поради помалата побарувачка, авиокомпаниите ќе мора да ги зголемат цените на билетите во обид да ги повратат своите финансии, пишуваат економистите. Сепак, поради зголемените трошоци за сервисирање на долгот, се очекува авиокомпаниите да пријават комбинирана загуба. Затоа, ќе се засилат мерките за намалување на трошоците. На крајот на краиштата, веројатно е спојување на авиокомпании, што главно ќе влијае на регионалните аеродроми.
