Од автомеханичари до монтери на кујни, работодавците ги мамат работниците со примамливи бонуси од 300 до 4000 евра. Анализата на платформата за вработување Indeed покажува дека исплатите на бонус при промена на работните места значително се зголемени. Во 2019 година, од милион огласи за вработување, 3050 огласи се објавени со бонус. Во 2023 година ги имало 7129.
Ова може да се објасни со состојбата на германскиот пазар на труд, кој продолжува да се развива во корист на вработените. Според последните анализи, во Германија во моментов има 1,7 милиони слободни работни места, додека работа бараат 2,6 милиони луѓе.
Тоа значи дека на работно место има околу 1,5 баратели на работа. Пред десет години имаше приближно четири баратели на работа за една позиција. Конкуренцијата на страната на вработените беше значително поголема. Денес, работодавачите се тие што треба да се рекламираат.
Бонусите најчесто се нудат во сектори каде што има особено голем недостиг на квалификувани работници, на пример на аеродромот во Франкфурт. Fraport, компанијата што управува со аеродромот, плаќа бонуси за новите вработени од 2022 година. Нејзината подружница FraGround нуди 1.000 евра за работа во копнените услуги.
„Авиосообраќајот беше првиот што беше погоден од епидемиолошките мерки за време на пандемијата и последната индустрија што се врати во нормала. Многу вработени ја напуштија компанијата во тоа време и се посветија на други активности“, изјави портпаролот на Fraport, Андреас Шопф. Од воведувањето на бонусот, компанијата доби 4.000 нови вработени.
Но, работодавачите не сакаат само вработените да дојдат, туку сакаат и тие да останат во компанијата. Тогаш зошто не даваат повисоки плати на места каде што се многу потребни квалификувани работници?
Причината за ова е економската пресметка, вели Мајкл Нојгарт, економист во TU Darmstadt. Доколку фирмите ја зголемат бруто-месечната плата за 100 или 200 евра, ќе треба да ја платат сумата за целото работно време. Еднократната исплата обезбедува финансиски поттик за вработените, додека работодавците не мора да преземаат долгорочни обврски - и остануваат во рамките на нивните финансиски можности.
