8 март не е само можност да се добие подарок, туку и да се потсетиме на историските факти.
Меѓународниот ден на жената, кој се слави на 8 март , има долга и значајна историја која датира повеќе од еден век. Овој ден потекнува од работничкото движење, а денес во светот се одбележува како можност да се прослават достигнувањата на жените, но и да се укаже на преостанатите предизвици и нееднаквости со кои се соочуваат.
Почетоци на Меѓународниот ден на жената
Семето на Меѓународниот ден на жената беше „посеано“ во 1908 година, кога 15.000 жени маршираа низ Њујорк барајќи пократко работно време, повисоки плати и право на глас. Овој настан го означи почетокот на борбата за правата на жените, а една година подоцна, Социјалистичката партија на Америка го прогласи првиот Национален ден на жената. Идејата да се воспостави меѓународен празник потекнува од Клара Четкин, која го предложила во 1910 година на Меѓународната женска конференција во Копенхаген.
Симболика на датуми и бои
Датумот 8 март беше избран за датум на Меѓународниот ден на жената по штрајкот организиран за време на Првата светска војна во 1917 година, кога Русинките бараа „леб и мир“. Тој датум бил 23 февруари според јулијанскиот календар, но 8 март според грегоријанскиот календар и оттогаш се слави како Меѓународен ден на жената. Боите на овој ден се виолетова, зелена и бела, а зелената ја симболизира надежта и белата чистота, пренесува „Би-би-си“.
Меѓународен ден на жената денеска
Меѓународниот ден на жената е можност да се прослават достигнувањата на жените во општеството, политиката и економијата, но и да се подигне свеста за преостанатите нееднаквости. Во многу земји овој ден е национален празник кој се слави на различни начини. На пример, во Русија, продажбата на цвеќиња се удвојува за три или четири дена околу 8 март, додека во Кина многу жени добиваат половина ден од работа. Во Италија, Меѓународниот ден на жената се слави со подарување пупки од мимози, а во Америка, месец март е месец на историјата на жената.
