Министерот за одбрана Владо Мисајловски најави дека од почетокот на следната година се планираат повисоки примања за вработените во одбранбениот сектор, а паралелно се работи и на подготовка на нов колективен договор во соработка со синдикатите.
Професионалните војници ќе можат да работат и по 45. година
Една од најавените промени се однесува на работниот статус на професионалните војници кои навршуваат 45 години.
Според предложеното решение, тие би добиле можност да продолжат со работа во Армијата сè до исполнувањето на условите за пензионирање.
Министерот информираше дека предлогот веќе бил разгледан на владин колегиум, а следниот чекор е негово разгледување на седница на Владата.
Се подготвува нов колективен договор
Во наредниот период се очекува потпишување нов колективен договор, со кој ќе се уредуваат правата и условите за работа на вработените во одбранбениот сектор.
Мисајловски нагласи дека при подготовката на договорот нема да бидат загрозени веќе стекнатите права на вработените.
Тој соопшти и дека во текот на неговиот мандат биле исплатени повеќе од 26 милиони евра по основ на судски тужби што потекнуваат од 2019 и 2020 година.
Во однос на модернизацијата на Армијата, министерот посочи дека набавките на оклопните возила „Страјкер“ и хаубиците се одвиваат според предвидената динамика.
Засега не е соопштено колкав ќе биде процентот или износот на најавеното зголемување на платите.