Оливија Ремес, истражувачка од Кембриџ, тврди дека најефикасна е комбинацијата во која се работи 52 минути, а потоа се одмара 17 минути. Правилото 52/17, верува таа, е сооднос на продуктивност и пауза што навистина функционира, особено ако за време на одморот целосно се исклучиме од технологијата. Денес е општоприфатено дека редовните паузи во текот на работниот ден ја зголемуваат продуктивноста, но колку треба да траат тие паузи зависи од методот на кој се потпираме, пренесува after5.
Оливија Ремес, инаку научничка од Кембриџ која се занимава со ментално здравје, тврди дека подолгите паузи можат да бидат поефикасни во борбата против попладневниот пад на енергијата и вели дека најпродуктивните луѓе во просек работат 52 минути, а потоа прават пауза од 17 минути. Таканареченото правило 52/17 постои веќе некое време и ветува поголема продуктивност и подобра рамнотежа меѓу деловниот и приватниот живот. Сепак, објавата на научничката од Кембриџ поттикна расправи на оваа тема. Ремес, која има докторат по јавно здравје и примарна здравствена заштита, тврди дека ова е далеку подобро од работа во долги, непрекинати интервали.
Мозокот, вели научничката, е како мускул и може да дојде до преоптоварување. Постојаниот прилив на е-пошта и Slack пораки, префрлањето од еден календар на друг, звуците од Teams повици и пораки и непрекинатите Zoom состаноци доведуваат до когнитивно и информациско преоптоварување. Бидејќи повеќето луѓе не можат едноставно да ја намалат количината на работа, се појавија различни методи поврзани со продуктивноста: од MTR рамката, која помага во одредување приоритети според важноста и временското влијание на задачите, преку time blocking – метод со кој работниот ден однапред се дели на блокови посветени на одредени активности, па сè до популарната Помодоро техника која ја структурира работата во пократки интервали на фокусиран труд и кратки паузи.
Сите овие пристапи имаат иста цел: да ја зголемат концентрацијата и да ја намалат расеаноста на вниманието, но дури и со сите тие алатки, па и со помош на вештачката интелигенција што презема дел од менталниот товар, концентрацијата од само неколку часа дневно и понатаму е предизвик. Затоа не е важно само кога правиме паузи, туку и како.
Пауза без употреба на технологија
Ремес објаснува дека научниците откриле дека „најпродуктивните луѓе за време на паузата на работа се целосно исклучени од технологијата“. Значи, не проверуваат е-пошта ниту скролаат по Инстаграм, ТикТок или X. Наместо тоа, целосно се одмараат и си даваат можност за опуштање и регенерација. Значи, не е важно само паузата да трае 17 минути, туку е важен и начинот на кој ја поминуваме таа пауза.
Исклучувањето, секако, не е лесно, особено во работна средина која не нуди флексибилност за паузи надвор од однапред зададените термини. Но, дури и ако не можете да издвоите цели 17 минути, доволно е секој час накратко да станете од работната маса: да одите по кафе, да прошетате низ канцеларијата или едноставно да гледате низ прозорецот и да размислите што ќе јадете за вечера. И тоа може да направи разлика.
Извор: mojposao.hr