Хотелските компании веќе објавија бројни огласи за работа, но интересот од домашната работна сила е сè помал, па работодавачите сè почесто бараат работници од странство.
Најголемата хотелска компанија во Црна Гора минатата недела објави серија огласи и официјално ја започна потрагата по околу 600 сезонски работници за летната сезона.
Претседателот на Здружението на угостители на Будва, Александар Јовановиќ, изјави дека обезбедувањето сезонска работна сила секоја година претставува сериозен проблем, бидејќи интересот за овие работни места во Црна Гора е мал.
Голема побарувачка за различни професии
На огласите на Заводот за вработување на Црна Гора се бараат работници за многу позиции во туризмот, меѓу кои:
баристи, координатори за плажа и базен, рецепционери, келнери, шанкери, готвачи, пекари, спасувачи, работници во велнес центри, перачи на садови, работници на плажа, магационери, хигиеничари и многу други.
Хотелската група „Будванска ривиера“ објави дека има потреба од голем број работници на различни позиции. Меѓу другото, се бараат:
30 келнери, пет мајстори за пица, 16 помошни готвачи, 27 работници на плажа и базен, 58 помошни работници во кујна, 28 спасувачи, 26 перачи на садови, како и повеќе десетици работници за барови, магацини и зеленило.
Сместување и три оброци
Од компанијата велат дека за сите сезонски работници е обезбедено сместување и три оброци дневно.
„Во пресрет на туристичката сезона објавивме повеќе огласи за работа. Секоја година ни се потребни околу 600 сезонски работници од различни профили – од собарки и келнери до готвачи и помошен персонал“, соопштија од „Будванска ривиера“.
Се бараат и ученици и студенти
Компанијата најави дека и оваа година ќе соработува со средни и високи стручни училишта, па дел од сезонските работници ќе бидат ученици и студенти, особено во периодот на врвот на сезоната во јули и август.
Во обид да го надминат недостигот на работници, хотелските компании веќе бараат нови извори на работна сила и на подалечни пазари, со цел успешно да ја реализираат туристичката сезона.