Општина Касандра, на првиот крак на Халкидики, одлучи да стави крај на долгогодишната практика на заземање места на јавните плажи со оставање пешкири, чадори за сонце, лежалки и друга опрема со часови, па дури и денови однапред.
Известувања поставени на плажите
На повеќе плажи веќе се поставени официјални известувања со кои посетителите се предупредуваат дека оставањето лични работи без присуство повеќе не е дозволено. Целта на оваа мерка е јавните плажи да бидат подеднакво достапни за сите капачи, без „резервирани“ места.
Според новите правила, сопствениците имаат рок од 24 часа да ја отстранат оставената опрема. По истекот на тој рок, комуналните служби имаат право да ја отстранат и да ја третираат како напуштен имот, без обврска да му ја вратат на сопственикот.
Слободен пристап до плажите
Одлуката е донесена во согласност со грчките прописи кои гарантираат слободен пристап до јавните плажи и спречуваат нивно незаконско присвојување. Тоа во пракса значи дека секој што ќе се обиде да си „резервира“ место со оставање пешкир или чадор ризикува, по враќањето, да ја затекне плажата без својата опрема.
Многу туристи и локални жители ја поддржаа оваа мерка, сметајќи дека конечно ќе се реши проблемот со раното заземање на најдобрите места на плажите и ќе се овозможи поправедно користење на крајбрежјето во текот на летната сезона.