Вирусот циркулира меѓу птиците и комарците, а луѓето се заразуваат преку каснување од инфициран комарец. Неговото ширење е поврзано со високи температури, топли зими и сушни периоди, услови кои стануваат почести поради климатските промени.
Иако вирусот во Европа е присутен со децении, во последните години секое лето се регистрираат случаи во Јужна и Централна Европа, особено во медитеранскиот регион и на Балканот. Експертите предупредуваат дека со продолжувањето на затоплувањето, вирусот би можел да се прошири и кон северните делови на континентот.
Колку е опасен вирусот?
Кај повеќето заразени лица симптомите се благи или воопшто не се појавуваат. Кај дел од пациентите може да се јават треска, главоболка, болки во мускулите, осип и отечени лимфни јазли.
Во околу еден процент од случаите може да се развијат сериозни невролошки компликации, како енцефалитис или менингитис. Тешките форми почесто се јавуваат кај постарите лица и можат да бидат фатални.
За вирусот нема специфичен третман ниту вакцина, па терапијата е насочена кон ублажување на симптомите.
Според истражувањето, климатските промени се еден од клучните фактори за проширувањето на вирусот во југоисточна Европа, бидејќи потоплите услови создаваат поповолна средина за комарците и за ширење на инфекцијата.