Рангирањето е дел од годишните Flyers’ Choice Awards 2026, организирани од AirlineRatings.com. За разлика од листите кои се креираат врз основа на стручни проценки, овие награди се базираат исклучиво на гласовите и искуствата на патниците.
Во рамки на изборот биле доделени признанија во повеќе категории, меѓу кои омилен нискобуџетен превозник, најдобар дизајн на авион, најдобра униформа на кабинскиот персонал, најдобра бизнис класа и најдобра економска класа.
Singapore Airlines освои четири награди
Најголем победник оваа година е Singapore Airlines, која освои дури четири признанија.
Авиокомпанијата беше прогласена за омилен превозник во економска класа, за компанија со најдобра услуга на кабинскиот персонал, најдобра авиокомпанија во Централна и Југоисточна Азија, како и превозник кој кај патниците создава најголемо чувство на сигурност и доверба.
Шерон Петерсен, извршна директорка на AirlineRatings.com, истакна дека резултатите на Singapore Airlines и Qantas во категоријата поврзана со сигурноста се особено значајни.
Според неа, довербата на патниците се гради постепено, а конзистентниот квалитет на услугата е еден од клучните фактори што влијаат врз тоа како патниците ја доживуваат една авиокомпанија.
Како поминаа европските превозници?
Европските авиокомпании годинава не успеаја да се најдат на врвот во поголемиот број категории.
Британскиот easyJet го подели третото место во изборот за најдобар нискобуџетен превозник во светот со австралискиот Jetstar. На првото место се најде виетнамскиот Vietjet Air, додека второто му припадна на AirAsia.
Во категоријата за авиокомпанија која создава најголемо чувство на сигурност и мир кај патниците, покрај првите три биле објавени и дополнителни позиции. Единствениот европски превозник меѓу првите шест е airBaltic, кој се најде на шестото место. Пред него се пласирале Singapore Airlines, Qantas и Etihad Airways.
Европските авиокомпании не успеале да освојат водечки позиции ниту во категориите за најдобар дизајн на авиони, најдобра бизнис класа, најдобра премиум економска и економска класа, најдобра униформа на кабинскиот персонал и најдобра услуга на кабинскиот персонал.
Сепак, кога патниците биле прашани кои им се омилени авиокомпании во Европа, најмногу гласови добиле British Airways, Lufthansa и KLM.
Резултатите од овогодинешниот избор покажуваат дека, според самите патници, азиските авиопревозници моментално имаат значителна предност кога станува збор за услугата, удобноста и довербата што ја уживаат кај своите патници.