Според најновиот извештај на компанијата TomTom, патување долго околу десет километри во Лондон во просек трае 35 минути и 7 секунди. Со тоа, градот уште еднаш го потврдува статусот на најбавен урбан сообраќај во светот, пренесува Daily Mail.
Сѐ потешки услови за возачите
Годишниот TomTom Индекс на сообраќај анализира податоци од корисници на навигациски системи во 501 град низ 62 земји и на шест континенти. Рангирањето се базира на повеќе фактори, меѓу кои: просечно ниво на сообраќајна гужва, просечна брзина на возење, растојание што може да се помине за 15 минути, како и времето изгубено за време на сообраќајните шпицеви.
Со милиони возила на улиците, состојбата во Лондон од година во година се влошува. Извештајот покажува дека просечното време на патување е продолжено за дополнителни 45 секунди во споредба со претходната година. Тоа значи дека еден просечен возач годишно губи дури 136 часа заглавен во сообраќајни гужви.
Особено се издвојува 10 септември 2025 година, денот со најголем сообраќаен колапс. Големиот штрајк на лондонското метро ги принуди граѓаните да бараат алтернативни начини на превоз, поради што до 17 часот нивото на сообраќајна гужва пораснало за дури 135 проценти.
Средновековни улици и модерен град
Енди Марчант, сообраќаен експерт од компанијата TomTom, вели дека позицијата на Лондон на врвот на оваа листа јасно укажува на огромниот притисок врз градската инфраструктура.
„Многу од лондонските улици потекнуваат уште од средниот век, а биле проширувани во георгијанскиот период. Тие едноставно не се проектирани за количината и разновидноста на сообраќај што ја имаме денес“, истакнува Марчант.
Сепак, тој гледа и потенцијално решение. Тестирањето на автономни возила треба да започне во 20 лондонски општини, што, според него, може да им помогне на градските власти и урбанистите да развијат поефикасни модели за управување со сообраќајот и движењето на луѓето низ градот.
Градови со најлош сообраќај во светот
Според просечната брзина на движење, листата изгледа вака:
• Лондон (Обединето Кралство) – 16,5 км/ч
• Бангалор (Индија) – 16,6 км/ч
• Мексико Сити (Мексико) – 17,4 км/ч
• Хајдерабад (Индија) – 18,4 км/ч
• Богота (Колумбија) – 18,9 км/ч
• Њујорк (САД) – 19 км/ч
• Буенос Аирес (Аргентина) – 19 км/ч
• Ченаи (Индија) – 19,2 км/ч
• Париз (Франција) – 20 км/ч
• Ахмедабад (Индија) – 20,7 км/ч