Според анализа на „Ројтерс“, масовната изградба на дата-центри и растечката побарувачка за чипови, електрична енергија, бакар и градежни материјали ја зголемуваат побарувачката побрзо од достапните капацитети.
Во такви услови, американските Федерални резерви се соочуваат со сложена задача: да ја ограничат инфлацијата без прекумерно да ги оптоварат домаќинствата и малите бизниси.
Технолошките гиганти продолжуваат да инвестираат и покрај високите камати, бидејќи располагаат со значителен капитал и очекуваат големи идни приходи. За помалите компании, пак, поскапите кредити можат да значат одложени инвестиции, помало производство и ограничени можности за раст.
Последиците може да ги почувствуваат и граѓаните преку поскапи станбени, автомобилски и други кредити доколку каматните стапки останат високи подолг период.
Трендот може да се одрази и врз Европа, а индиректно и врз Македонија, преку глобалните цени на суровините и условите за финансирање. Сепак, американските каматни стапки не се пренесуваат автоматски врз македонските кредити, бидејќи домашните услови зависат и од политиката на Народната банка и состојбите во банкарскиот сектор.
На подолг рок, вештачката интелигенција може да ја зголеми продуктивноста и да ги намали трошоците на компаниите. Но, засега останува неизвесно кога овие придобивки ќе ги надминат инфлациските притисоци што ги создава големиот инвестициски бран.