Според информациите од СВР Охрид, системот за сообраќаен надзор започнал со работа на 12 октомври, кога во текот на првиот ден биле евидентирани 148 прекршоци.
Идентичен број прекршоци биле регистрирани и следниот ден, на 13 октомври, заклучно со 19 часот.
Така, за само два дена, камерите на подрачјата на четирите градови забележале речиси 300 случаи на непочитување на сообраќајните правила.
Кои прекршоци се најчести?
Најголемиот број регистрирани прекршоци се однесуваат на пречекорување на дозволената брзина, како во населени места, така и надвор од нив.
Меѓу евидентираните неправилности се и поминување на црвено светло на семафор, како и учество во сообраќајот со нерегистрирани возила.
Од полицијата посочуваат дека сите случаи се соодветно документирани преку системот за надзор.
Возачите добиваат известувања преку СМС и е-пошта
За утврдените прекршоци, до сопствениците на возилата се испраќаат известувања преку СМС-пораки и електронска пошта.
На овој начин, возачите се информираат за прекршоците што биле регистрирани од системот.
Од СВР Охрид повторно апелираат до сите учесници во сообраќајот да ги почитуваат ограничувањата на брзината, светлосната сигнализација и останатите сообраќајни правила.
Целта на системот „Безбеден град“ е да придонесе за поголема дисциплина кај возачите, намалување на ризиците во сообраќајот и подобрување на безбедноста на патиштата.