При купувањето, многу патници најчесто гледаат колку чини полисата и колкава е максималната осигурена сума. Сепак, тоа не е доволно за да се утврди која понуда е најдобра.
Две полиси со слична цена можат да нудат сосема различно ниво на заштита. Едната може да покрива само основни медицински трошоци, додека друга да вклучува итна стоматолошка помош, изгубен или задоцнет багаж, медицински транспорт, асистенција при загубени документи и дополнителни ризици.
Затоа, пред патување поважно од прашањето „Колку чини?“ е да се провери што точно покрива полисата доколку навистина се појави проблем.
Медицинските трошоци се најважниот дел
Основната цел на патничкото здравствено осигурување е да помогне при ненадејни здравствени проблеми во странство.
Во зависност од осигурителот и избраниот пакет, покритието може да опфаќа амбулантски прегледи, болничко лекување, дијагностика, неопходни лекови, итни операции, медицински материјали и транспорт до соодветна здравствена установа.
Кај посериозни случаи, одредени полиси можат да обезбедат и организација на транспорт на осигуреникот назад во матичната земја, доколку е потребно продолжување на лекувањето.
Но за активирање на полисата не мора да се случи тешка несреќа. Стомачен вирус, висока температура или ненадејна силна забоболка можат да бараат лекарска помош, а медицинските услуги за странски државјани во некои земји може да бидат значително поскапи отколку што очекуваат патниците.
Затоа патничкото осигурување треба да се гледа како финансиска заштита од непредвидени ситуации, а не само како документ кој се купува пред преминување на границата.
Што ако го изгубите пасошот или багажот?
Некои осигурителни пакети предвидуваат и одредена помош доколку пасошот или другите лични документи бидат изгубени или украдени.
Тоа не значи дека осигурителната компанија ќе ви издаде нов пасош, но зависно од конкретната полиса, може да бидат покриени одредени трошоци или да биде обезбедена асистенција при решавањето на проблемот.
Слична е ситуацијата и со багажот.
Одредени полиси покриваат изгубен или задоцнет багаж, но тоа најчесто важи до однапред утврден лимит и под точно дефинирани услови.
Затоа не е доволно во полисата само да стои дека „багажот е осигурен“. Треба да се провери колкава е сумата, кои предмети се опфатени и во кои ситуации се активира покритието.
Ако планирате спорт, проверете ги условите
Патниците кои на одмор планираат спортски или авантуристички активности треба да бидат особено внимателни.
Стандардното патничко осигурување не мора автоматски да покрива повреди настанати при активности кои осигурителот ги смета за ризични.
Скијање, нуркање, алпинизам, параглајдинг, поинтензивно возење велосипед и други слични активности можат да бараат дополнително спортско покритие.
Токму тука често се јавува заблудата дека патничкото осигурување значи дека „сè е покриено“. Во реалноста, покритието зависи од конкретните услови.
Затоа полисата треба да се избира според начинот на кој ќе го поминете патувањето, а не само според дестинацијата.
Семејство кое оди на мирен седумдневен одмор има различни ризици од лице кое заминува на скијање или планира екстремни спортови.
Бременост и хронични состојби
Посебни услови можат да важат и за бремени жени. Кај одредени осигурители може да постои покритие за ненадејни компликации до определена недела од бременоста и под конкретни услови.
Сепак, патничкото осигурување не е наменето за редовни контроли, однапред планирани прегледи или планирано породување.
Внимателно треба да се проверат и условите поврзани со хроничните заболувања. Полисите главно се наменети за ненадејни и непредвидени ситуации, па редовното лекување на веќе позната состојба може да биде исклучено.
Кај некои производи, сепак, може да постои ограничено покритие ако дојде до ненадејно влошување на хроничната состојба и е потребна итна медицинска стабилизација.
И забоболката може да биде покриена – но само во одредени случаи
Ненадејна силна забоболка на одмор може да резултира со итна посета на стоматолог.
Одредени патнички полиси можат да покријат итна стоматолошка интервенција до утврден лимит. Но тоа не значи дека може да се искористи осигурувањето за однапред планирана поправка на заб.
Ако знаете дека треба да направите стоматолошка интервенција и одлучите да ја направите додека сте во странство, тоа не е ситуација за која е наменето патничкото осигурување.
Внимание на исклучоците
Покрај тоа што треба да се знае што е покриено, важно е да се провери и што е исклучено од полисата.
Повреди или штети директно поврзани со прекумерно консумирање алкохол, употреба на наркотични средства или злоупотреба на лекови можат да бидат исклучени од покритието.
Исклучоци често постојат и за намерно самоповредување, како и за штети кои произлегуваат од воени дејства, немири и слични ризици.
Токму условите и исклучоците во полисата можат да одредат дали одреден трошок ќе го преземе осигурителот или ќе остане на товар на патникот.
Најевтината полиса не мора да биде најдобрата
При изборот не треба да се гледа само цената, но ниту најскапата полиса автоматски не значи дека е најсоодветна.
Важно е да се споредат:
- вкупната осигурена сума;
- медицинските покритија;
- лимитот за итна стоматолошка помош;
- условите за изгубен или задоцнет багаж;
- спортското покритие;
- територијата на која важи полисата;
- исклучоците и ограничувањата.
Важна е и постапката доколку навистина се случи проблем.
Во зависност од условите на полисата, не е препорачливо самостојно да се оди во која било приватна клиника и потоа да се очекува автоматски рефундирање на трошоците.
Најдобро е што е можно побрзо да се контактира асистентскиот центар на осигурителната компанија и да се следат добиените инструкции.
Телефонскиот број за асистенција и самата полиса добро е да ги имате зачувано и во телефонот, а не само во багажот.
Исто така, треба да се зачуваат сметките, медицинските извештаи, рецептите, потврдите од аеродромот и другата релевантна документација, бидејќи може да бидат потребни при поднесување барање за надомест.
Патничкото осигурување најчесто претставува релативно мал трошок во споредба со целото патување. Кога одморот ќе помине без никакви проблеми, можеби ќе изгледа како непотребен трошок.
Но еден лекарски преглед, итна стоматолошка интервенција, повреда или изгубен багаж може да направи полисата да биде една од најкорисните работи што сте ги купиле пред патувањето.
Затоа, пред да заминете, не проверувајте само колку чини патничкото осигурување – проверете што навистина ви покрива кога најмногу ќе ви треба.