Еврото се подготвува за своето најголемо визуелно и безбедносно преобликување од моментот кога беше пуштено во оптек. Препознатливи историски мотиви и природни богатства наместо досегашните апстрактни елементи, заедно со значително понапредни заштитни функции, се во основата на новиот дизајн на банкнотите.
Предлозите на ЕЦБ го означуваат првиот целосен визуелен прекин со досегашните банкноти кои ги носиме во паричниците.
„Во тек е првото целосно визуелно преобликување на банкнотите на еврото, со нови теми и мотиви, со цел тие дополнително да им се доближат на граѓаните на Европа“, изјави директорката на секторот за банкноти во ЕЦБ, Дорис Шнебергер.
ОВДЕ погледнете како потенцијално ќе изгледаат.
Што ќе има на новите банкноти?
Кога беа пуштени во оптек во 2002 година, банкнотите на еврото ја носеа темата „Епохи и стилови“, прикажувајќи апстрактни прозорци, порти и мостови кои всушност не постојат во реалноста. Новиот дизајн ќе направи целосен пресврт кон реални и препознатливи симболи.
Меѓу финалистите се избрани две доминантни теми:
- Европска култура: Прикажување на значајни личности кои ја одбележале историјата на уметноста, музиката, науката и книжевноста.
- Богатството на природата: Прикази на европски реки и карактеристични птици.
Анкетата во која учествуваат милиони Европејци ќе одлучи за победничката тема, а официјалните резултати ќе бидат објавени во декември 2026 година. Сепак, до нивното пуштање во оптек ќе поминат уште неколку години – се проценува дека новите банкноти би можеле да се најдат во паричниците на граѓаните дури во 2029 година.
Дали готовината навистина заминува во историјата?
Во однос на теориите дека воведувањето на дигиталното евро е чекор кон целосно укинување на хартиените пари, од ЕЦБ со сликовита споредба ги отфрлаат сомнежите:
„Никој не ја реновира куќата која планира наскоро да ја урне“, јасна е Шнебергер.
Претставниците на ЕЦБ нагласуваат дека дигиталното евро не доаѓа како замена, туку како дополнување на традиционалните пари. Граѓаните ќе ја задржат целосната слобода да изберат дали ќе плаќаат со готовина, дигитално евро или со комерцијални платежни картички.
Редизајнот на банкнотите, според тоа, претставува стратегија за зајакнување на готовината како примарна форма на „јавни пари“ – пари кои директно ги издава и ги гарантира централната банка, за разлика од приватните пари на сметките во комерцијалните банки.