Изборот за 2027 година покажува дека интересот сè повеќе се насочува кон места со помалку туристички гужви, автентично локално искуство и дестинации кои сè уште не се целосно преплавени со масовен туризам.
Меѓу препорачаните места е Монсерат, карипски остров познат по црните вулкански плажи и планинските предели. Од САД се издвојува Мериленд, особено поради природата, крајбрежјето и морската храна, додека во Канада се препорачани Квебек и Островот Принц Едвард.
Азија со низа интересни избори
На азискиот континент се најдоа Ченгду во Кина, Окинава во Јапонија, Гуџарат во Индија и Дананг во Виетнам.
Ченгду е познат по пандите, чајџилниците и гастрономијата, но и по поспориот начин на живот. Окинава, пак, се издвојува со својата суптропска островска култура, која значително се разликува од онаа во другите делови на Јапонија.
Интересен избор се и Малдивите, но Lonely Planet не ги насочува патниците кон класичните луксузни ресорти. Наместо тоа, го издвојува островот Фулиду, кој нуди подостапно и полокално искуство.
Африка и Европа
Во Африка се препорачани националните паркови Цаво Исток и Цаво Запад во Кенија, како и Рабат во Мароко.
Цаво се издвојува како сафари-дестинација со огромни природни пространства и помал број туристи, додека Рабат е претставен како помирна алтернатива на популарниот Маракеш.
За патниците од Македонија особено интересен е изборот на Шибеник во Хрватска. Градот е издвоен како јадранска дестинација каде има значително помалку гужви во споредба со Дубровник и Сплит.
Lonely Planet ги издвојува стариот град, тврдините, локалната гастрономија и близината до Националниот парк Крка. Шибеник има и две локации под заштита на УНЕСКО – катедралата „Св. Јаков“ и тврдината „Св. Никола“.
Европската листа ја дополнуваат Венето во Италија, Десау во Германија, Леон во Шпанија и Сканер-Фалстербо во Шведска.
Меѓу подалечните избори се Нова Каледонија, регионот Твид во Австралија и Данидин и Ваитаке во Нов Зеланд.
25-те дестинации на Lonely Planet за 2027:
- Квебек, Канада
- Северното крајбрежје на Калифорнија и парковите со секвои, САД
- Мериленд, САД
- Островот Принц Едвард, Канада
- Ново Мексико, САД
- Венето, Италија
- Десау, Германија
- Сканер-Фалстербо, Шведска
- Шибеник, Хрватска
- Леон, Шпанија
- Монсерат
- Барилоче и околните езера, Аргентина
- Гранада, Никарагва
- Бокас дел Торо, Панама
- Оман
- Рабат, Мароко
- Цаво Исток и Цаво Запад, Кенија
- Данидин и Ваитаке, Нов Зеланд
- Твид, Австралија
- Нова Каледонија
- Окинава, Јапонија
- Ченгду, Кина
- Гуџарат, Индија
- Дананг, Виетнам
- Фулиду, Малдиви
Lonely Planet наведува дека изборот е направен врз основа на искуствата и препораките на неговите автори, уредници и глобалната туристичка заедница, со акцент на дестинации кои нудат нешто поинакво од традиционалните масовни туристички рути.
Изданието „Best in Travel 2027“, објавено во септември, содржи вкупно 25 дестинации и 25 посебни патувачки искуства.