Сепак, повисоката плата не значи автоматски и подобра работа. Ако сега заработувате 40.000 денари, а новата компанија ви нуди 50.000 денари, разликата од 10.000 денари месечно изгледа како добра причина за промена.

Но, двете понуди треба да ги споредите според целиот пакет што го добивате за својот труд, а не само според сумата што ќе ви легне на сметка.

Фактори што не се гледаат во платата

Да претпоставиме дека моментално работите од дома три дена во неделата, а на новото работно место мора секој ден да одите во канцеларија. Ако дополнителниот превоз, горивото или паркингот ве чинат околу 200 денари дневно, трите дополнителни одења неделно може да ве чинат околу 2.500 денари месечно. Тогаш разликата во платата веќе не е 10.000, туку околу 7.500 денари.

Ако на сегашното работно место имате обезбеден ручек, бонус, приватно здравствено осигурување или платен телефон, а новата компанија не ви ги нуди овие поволности, разликата дополнително се намалува. А тука сè уште не е пресметано времето.

Ако до новото работно место патувате половина час подолго во еден правец, тоа е дополнителен час дневно, односно околу 20 часа месечно. Практично, два и пол работни дена повеќе ќе поминувате во превоз.

Можеби промената и понатаму ви се исплаќа, но важно е да знаете што точно добивате, а што губите.

Што треба да споредите?

1. Нето-плата

Споредете ја сумата што навистина ќе ја добивате. Варијабилниот дел одвојте го од гарантираната плата. Не е исто да добивате загарантирани 50.000 денари или 40.000 денари плус бонус до 10.000 денари. Ако бонусот зависи од резултатите, пресметајте го одделно.

2. Трошоци за одење на работа

Пресметајте ги горивото или јавниот превоз, паркингот, патарините и повременото користење такси. Неколку стотици денари дневно лесно може да станат неколку илјади денари месечно.

3. Број на денови поминати во канцеларија

Разликата меѓу два и пет дена работа во канцеларија влијае врз трошоците за превоз, храна и облека, но и врз организацијата на децата и слободното време. Затоа хибридното работење има конкретна економска вредност.

4. Времето што ви го одзема работата

Пресметајте го времето „од врата до врата“. Работно место со осумчасовно работно време и два часа патување, всушност, ви одзема десет часа дневно.

5. Бонуси и финансиски поволности

Споредете ги годишните или кварталните бонуси, 13. плата, регресот, оброците, службениот автомобил, телефонот и покриените патни трошоци.

Направете разлика меѓу она што е загарантирано и она што можеби ќе го добиете. Ако ви ветуваат бонуси, прашајте колку вработени навистина ги добиваат и колкав е нивниот просечен износ.

6. Приватно здравствено осигурување и други бенефиции

Приватното здравствено осигурување, дополнителните денови одмор, едукациите, психолошката поддршка или животното осигурување имаат вредност само ако навистина би ги користеле или би плаќале за нив.

Бесплатната членарина во фитнес-сала не значи многу ако никогаш не одите таму.

7. Прекувремена работа

Компанијата А може да ви понуди плата од 40.000 денари за работа што завршува во 17 часот, а компанијата Б – 50.000 денари, но со редовно останување до 19 часот.

Два дополнителни часа дневно значат околу 40 часа месечно, односно цела дополнителна работна недела. Затоа прашајте колку често вработените во тимот остануваат по завршувањето на работното време.

8. Договор и сигурност

Споредете дали договорот е на определено или на неопределено време, колку трае пробниот период, колку е стабилна компанијата и колку долго вработените остануваат во тимот.

Повисоката плата може да има помала вредност ако со неа доаѓа и значително поголема несигурност.

9. Можност за напредување

За една третина од испитаниците на Регионалниот саем за вработување, можноста за напредување е меѓу најважните критериуми.

Работно место што денес е платено 5.000 денари помалку можеби ќе ви овозможи да стекнете знаење кое за две години значително ќе ја зголеми вашата вредност на пазарот на трудот.

Од друга страна, ветувањето дека „многу ќе научите“ може да биде само изговор за пониска плата. Затоа прашајте што конкретно ќе работите, кој ќе ве обучува и какви се можностите за кариерен развој.

10. Колективот и раководителот

Ова најтешко се изразува во пари, но лошото раководење има своја цена. Микроменаџирањето, повиците надвор од работното време, постојаното менување на приоритетите, конфликтите и нејасните очекувања можат целосно да ја променат вредноста на понудата.

Затоа, платата од 50.000 денари кај раководител од кого ќе сакате да избегате по три месеци можеби не е подобра од платата од 40.000 денари кај некого од кого можете да учите и кој ви дозволува самостојно да ја извршувате својата работа.