Станува збор за феноменот познат како newsjacking – маркетинг тактика во која компаниите ги користат актуелните и вирални вести за да се вклучат во разговорот кој веќе го привлекува вниманието на јавноста.
Наместо класично огласување, брендовите преку хумор, досетки или паметни паралели стануваат дел од темата за која сите зборуваат.
Во случајот со кражбата на чоколадо, теренот беше идеален: необична и глобално интересна вест, доволно „лесна“ за да дозволи креативни интерпретации. Така, на социјалните мрежи брзо се појавија реакции кои ја преведуваат оваа ситуација на јазикот на бизнисот. HR платформите алудираат на вработени кои „зеле пауза“, логистичките компании ја нагласуваат сигурноста на своите испораки, додека технолошките алатки потсетуваат дека, иако чоколадото го нема, роковите и задачите остануваат.
Кога вирална вест станува маркетинг case study
Ниту домашниот деловен контекст не заостанува зад овој тренд. Во духот на секојдневието во канцеларискиот живот, пораки како „Исчезнаа 12 тони чоколадо. KPI-ите не“ или „Додека едни крадат чоколадо, други крадат внимание“ јасно покажуваат како една вирална вест може да се претвори во комуникација која е истовремено духовита и релевантна.
Токму во тоа лежи силата на newsjacking-от – во способноста брендот да се вклучи во веќе постоечки наратив, без потреба сам да го создава. Кога е добро изведен, резултатот не е само краткотрајна шега, туку конкретна видливост и ангажман на публиката.
Сепак, експертите предупредуваат дека ваквиот пристап бара мерка. Темите треба внимателно да се избираат, бидејќи она што во еден случај е забавно, во друг може да биде несоодветно. Во овој случај, чоколадото се покажа како „безбедна зона“.
На крајот, иако некој остана без 12 тони слатки, многумина добија можност да „украдат“ нешто што во современиот бизнис е највредно – вниманието.