Продавачот на половни возила Autobahn Motors во декември 2017 година отвори футуристички салон на 15 ката, со автомобили изложени во 60 одделни слотови, претставувајќи го како „најголемиот автомат за луксузни автомобили на светот“.
Купувачите на приземје преку екран на допир го избираат автомобилот што сакаат да го видат. Возилото пристигнува за една до две минути благодарение на напредниот систем за управување со преземање на автомобилите, наведува компанијата.
Гери Хонг, генерален менаџер на Autobahn Motors, изјави дека овој формат на „автомат“ е осмислен за ефикасно искористување на просторот во Сингапур, каде што земјиштето е многу ограничено, но и за да се издвојат од конкуренцијата.
„Моравме да го исполниме барањето да складираме голем број автомобили. Истовремено сакавме да бидеме креативни и иновативни“, изјавил тој за Ројтерс.
Тој додал дека им се обратиле инвеститори заинтересирани за користење на системот на компанијата — Automotive Inventory Management System — за потребите на паркинг-сервисите.
Во понуда се возила — од современи луксузни спортски автомобили до класични модели, вклучувајќи Morgan Plus 4 од 1955 година.
Американската компанија Carvana исто така користи кули налик автомати за продажба на половни автомобили. Во март отвори осумкатна структура во Сан Антонио, Тексас, која може да прими до 30 возила.