Станува збор за грчкиот дел од Коридорот 10, кој е една од најкористените рути за македонските граѓани при патување кон Грција.
Целиот патен правец од Халастра до Евзони е долг околу 60 километри, а најголемиот дел од градежните активности се одвива на делницата долга околу 44 километри, меѓу Халастра, односно клучката кај Аксиос, и Поликастро.
Две ленти во секоја насока и дозволена брзина до 120 км/ч
Постојниот пат на оваа делница располага со по една широка сообраќајна и една помошна лента во секоја насока, при што не постои физичка разделба меѓу возилата кои се движат во спротивни правци.
Со реконструкцијата тоа треба целосно да се промени.
Предвидени се по две сообраќајни ленти во секоја насока, ленти за принудно запирање и средишна заштитна ограда. Проектот опфаќа и изградба на нови мостови и надвозници, како и реконструкција на клучките кај Аксиос, Гефира и Поликастро.
Проектната брзина на новиот пат ќе изнесува 120 километри на час.
Последните приближно 15 километри од Поликастро до граничниот премин Евзони веќе се изградени како автопат со два одвоени коловоза. Поради тоа, главниот дел од модернизацијата е насочен кон делницата јужно од Поликастро.
Еден од најризичните делови од патот треба да стане побезбеден
Една од главните цели на проектот е зголемување на безбедноста во сообраќајот.
Според податоци што ги пренесуваат грчките медиуми, во сообраќајни несреќи на делницата Халастра – Евзони во изминатите две децении загинале 50 лица, додека 117 биле тешко повредени.
Како долгогодишни проблеми на овој пат се посочуваат недостигот од средишна заштитна ограда, директните приклучоци на патот, недоволната осветленост и мешањето на локалниот со транзитниот сообраќај.
Повеќе од 420 милиони евра за патната мрежа
Работите се спроведуваат во рамките на 35-годишната концесија за „Егнатија Одос“ и нејзините вертикални патни правци.
Управувањето со мрежата кон крајот на 2025 година го презеде концесионерот „Неа Егнатија Одос“, зад кој стојат грчката GEK TERNA и француската Egis Projects.
Во првите пет години од концесијата се планирани повеќе од 420 милиони евра инвестиции за обновување и надградба на патната инфраструктура.
Истовремено, грчките власти во поширокиот развоен план за Солун до 2030 година предвидуваат значителни инвестиции во транспортната инфраструктура и подобрување на поврзаноста на Северна Грција.
Кога треба да биде готов автопатот?
Доколку планираните рокови бидат испочитувани, модернизацијата на патниот правец кон Евзони треба да биде завршена до крајот на 2029 година или во текот на 2030 година.
По завршувањето на проектот, возачите кои влегуваат во Грција од Македонија ќе можат од граничниот премин Евзони до западниот влез во Солун да се движат по целосно оформен автопат, со што ќе биде елиминиран сегашниот ризичен дел на кој сообраќајот се одвива двонасочно.