Го претставија како врв на вештачката интелигенција, интелектуалец со „диплома“ во секакви области, подготвен да ги надмине сите досегашни модели. GPT-5, најавуван како новиот „доктор на науки“ на OpenAI, требаше да биде големиот чекор напред. Но, наместо овации, доби ладен туш – и тоа од сопствените корисници.
Само 24 часа по тоа што GPT-5 стана стандарден модел, а GPT-4o беше избришан од изборот, интернетот се запали од коментари: „ладен“, „без емоција“, „премногу роботски“. Некои го опишаа како да зборуваат со автомат за кафе – функционален, но без вкус. Други едноставно ја откажаа Plus претплатата, праќајќи јасна порака: „Вратете го оној што нè разбираше“.
OpenAI мораше да попушти. GPT-4o повторно е достапен, а GPT-5 оди на „дополнителна едукација“ – или, како што велат од компанијата, ќе добие „подобрувања“. Секако, најавена е и „поголема транспарентност“ за тоа кој модел одговара на корисничките барања, но тоа веќе звучи како класична пи-ар фраза.
За сега, љубителите на GPT-4o можат да здивнат. „Докторот“ GPT-5 може и да се врати, но ако сака да преживее повеќе од 24 часа во дивиот свет на корисничките очекувања, ќе мора да научи една лекција – понекогаш, подобро е да бидеш топол човек отколку ладен гениј.