Откако ја изгуби работата во март 2025 година, Лесли аплицирала за повеќе од 300 работни места. Таа ја прилагодувала својата биографија, пишувала мотивациони писма, разговарала со регрутери, контактирала со менаџери за вработување и се обидувала да најде позиции што ќе одговараат на нејзиното богато искуство.
Сепак, наместо нејзините 32 години работа да бидат предност, таа имала чувство дека токму ова искуство ѝ ја затвора вратата.
„Никогаш не сум била во ситуација да не можам да најдам работа. Тешко ми е и понекогаш ми е непријатно, но морам да верувам дека ова е само момент и дека ќе продолжам таму каде што застанав“, рече таа.
Во текот на нејзината кариера, Лесли работела како координатор за маркетинг, водела сопствен бизнис 11 години, а нејзината последна позиција била директор за содржина и комуникации во маркетинг агенција.
И покрај искуството, бројот на одговори од компаниите бил мал. За неа било особено фрустрирачки што на платформите за вработување често гледала стотици кандидати како аплицираат за едно работно место.
„LinkedIn може да напише дека повеќе од 100 луѓе аплицирале, но тоа може да значи и 101 или 1.001. Веќе имате чувство дека шансите се против вас, пред некој дури и да ја погледне вашата биографија“, рече таа.
За да ги зголеми своите шанси, таа го прилагодила своето CV според барањата на огласот и користела вештачка интелигенција за да го усогласи искуството со бараните вештини.
„Знам дека носам вредност. Имам добра проценка, зрелост, креативност и децениско искуство во градење брендови. Подготвена сум да учам и да иновирам. Дури и ги научив помладите колеги како да ја користат вештачката интелигенција“, истакна таа, пишува Business Insider.
По бројни неуспешни обиди, Лесли верува дека една од причините за одбивањето е токму нејзиното животно и професионално искуство.
„Единствениот заклучок до кој можам да дојдам е дека сум преквалификувана за многу работни места или дека работодавците мислат дека сум предолго во индустријата и дека ми е тешко да се прилагодам“, рече таа.
Таа вели дека дури и регрутерите ја советувале да ги наведе само последните десет години работно искуство во своите апликации.
Според неа, многу компании претпочитаат да избираат помлади кандидати бидејќи очекуваат дека ќе бидат полесни за управување и дека ќе им понудат пониска плата.