Германската економија се соочува со загрижувачки тренд – во текот на минатата година биле затворени 187.744 компании, што е речиси 10% повеќе од 2024 година и најголем број затворања во последните речиси две децении.

Последен пат поголем број бил забележан во 2007 година, кога згаснале околу 208.000 компании, покажува заедничката анализа на Creditreform и Центарот за европски економски истражувања ZEW.

Причините не се само финансиски проблеми. Германските компании како најголеми предизвици ги посочуваат високите трошоци за енергија, недостигот од квалификувани работници, бирократијата и неможноста да најдат наследници кои ќе го продолжат бизнисот.

„За разлика од претходните години, сега со работа престануваат и компании кои всушност се здрави“, предупредуваат од Creditreform.

Особено е погоден угостителскиот сектор. Во 2025 година биле затворени околу 15.000 ресторани и сместувачки капацитети, што е раст од 15% во однос на претходната година.

Сериозна е состојбата и во здравството, каде што биле затворени речиси 5.500 лекарски ординации, или 23% повеќе од една година претходно.

И германската индустрија го чувствува притисокот – околу 11.000 индустриски компании престанале со работа, што е за 10% повеќе во споредба со претходната година.

Сепак, затворањето на компаниите не значи дека сите банкротирале. Само 13% од речиси 190.000 затворени фирми биле згаснати поради стечај.

Голем проблем е и генерациската смена. Сè повеќе сопственици заминуваат во пензија без да најдат некој што ќе го преземе бизнисот, а овој фактор е одговорен за приближно една третина од сите затворања.

Бројките покажуваат дека проблемот во Германија не е само во компаниите што пропаѓаат, туку и во тоа што сè повеќе функционални бизниси едноставно исчезнуваат од пазарот.