Според информациите, трговците на големо треба да ги намалат цените за најмалку 10 отсто, додека кај трговците на мало намалувањето треба да изнесува најмалку 15 отсто.
Мерката опфаќа повеќе производи што им се потребни на учениците за почетокот на учебната година. На листата се ранци и ташни, тетратки, блокови, колаж, моливи и пенкала, боици, пластелин, теста за моделирање, фломастери, линијари и дидактички материјали.
Ова е трета година по ред во која пред почетокот на учебната година се воведува таканаречена „училишна кошничка“. Целта на мерката е да се намалат трошоците за родителите во периодот кога семејствата имаат зголемени расходи за подготовка на децата за училиште.
Намалувањето на цените е особено значајно за семејствата со повеќе деца, кои треба да обезбедат поголема количина училишен прибор.
Мерката ќе биде активна заклучно со 30 септември, што значи дека родителите во текот на целиот месец ќе можат да ги набавуваат опфатените производи по пониски цени.