БРИТАНСКИОТ нафтен гигант „Шел“ постигна највисок квартален профит од 2008 година, во првите три месеци од оваа година, во износ од 9,1 милијарди долари, благодарение на високите цени на нафтата и гасот.
Прилагодената добивка на Шел се зголеми речиси тројно во однос на 3,2 милијарди долари во првиот квартал од минатата година и 2,7 милијарди повеќе од добивката во четвртиот квартал од 2021 година, која изнесуваше 6,4 милијарди долари, пренесуваат западните агенции.
Извештајот на Шел ги охрабри еколошките активисти и политичарите повторно да побараат воведување на еднократен итен данок на добивка за нафтените и гасните компании, што во голема мера е резултат на зголемените цени на енергијата. Според Блумберг, британскиот премиер Борис Џонсон изгледа веќе ја отфрлил таквата можност, наведувајќи дека тоа би ги обесхрабрило виталните инвестиции во домашното снабдување со енергија.
Шел потврди дека отпишала средства од 3,9 милијарди долари на име на излегувањето на компанијата од операциите во Русија, вклучително и проектот за течен природен гас Сахалин-2.
Компанијата претходно предупреди дека по повлекувањето од Русија може да ги отпише своите средства во вредност од 4,0 до 5,0 милијарди долари. Од Шел велат дека не се очекува овие трошоци да влијаат на усогласената плата.
Акциите на Шел утринава на лондонската берза скокнаа за 2,3 отсто на 22,76 фунти, а од почетокот на годината поскапеа над 36 отсто.
Компанијата, исто така, објави зголемување на дивидендата од околу 4,0 отсто до 0,25 долари по акција за првиот квартал.
