Резултатите од големото национално истражување за животните и здравствените навики на 20-годишниците од платформата „Zdravo dvadesete“, од компанијата Галеника а.д. Белград покажа дека 66 отсто од младите, оценувајќи ја сопствената здравствена состојба, велат дека немаат сериозни здравствени проблеми и дека се здрави или многу здрави.
Сепак, 78 отсто од анкетираните изјавиле дека имаат некој помал здравствен проблем, а најчести се замор, настинки, дебелина, проблеми со 'рбетот и главоболки. Депресија или анксиозност споменуваат речиси четвртина од младите испитаници, од кои повеќето се жени. Жените исто така повеќе страдаат од замор, слаб имунитет, проблеми со хормоните и отпорност на инсулин. Потешки здравствени проблеми споменуваат три проценти од испитаниците.
Платформата „Zdravo dvadesete“ спроведе истражување за животните навики на дваесетгодишниците на примерок од 600 испитаници од цела Србија. Целна група беа младите на возраст од 19 до 25 години, како и населението на возраст од 26 до 30 години. Помладата група на испитаници главно ја сочинуваат ученици кои сè уште живеат со своите родители, додека постарата група се состои главно од оние кои го завршиле процесот на формално образование и живеат или со родителите или со својот партнер.
Секојдневни навики
Дел од младите се трудат да воспостават рамнотежа меѓу духот и телото, за телото се грижат преку здрава исхрана и физичка активност, додека духот го негуваат преку хобиња, слободно време и време посветено на другите луѓе. Дел од испитаниците го исфрлиле месото од исхраната, но сметаат дека суплементите и дополнувањето на исхраната се многу важни, додека како доминантни физички активности ги наведуваат јогата и медитацијата. Група млади луѓе се истакнаа како подгрупа кои ги исфрлија цигарите и алкохолот од својот животен стил и се трудат што помалку да користат дроги. Тие сметаат дека прекувремената работа е еден од отровите на модерниот начин на живот.
Првата поврзаност со здравјето и здравиот живот на младите (од урбаните средини) се спортот и физичката активност, здравата исхрана (за младите од руралните средини и постарата група испитаници) и грижата за менталното здравје. Жените им придаваат поголемо значење на повеќето фактори, додека кај мажите се истакнува важноста на верата во Бог и посветеноста на црквата и религијата. За постарата група испитаници важно е да имаат работно време до осум часа дневно, а интересно е и тоа што за младите од Белград и Војводина, во поголема мера отколку за другите, здрава животна средина во која тие живеат и работат е важен фактор.
Фактори кои го дефинираат начинот на живот
Во текот на истражувањето, забележани се пет основни фактори кои ги одредуваат ставовите и начинот на живот на дваесетгодишниците. За повеќе од 25 проценти од испитаниците, одлучувачки фактори се статусот и моќта во општеството, кои се постигнуваат преку атрактивен изглед, скапа гардероба и добра заработка. На повеќето од постарата група на испитаници им е важно да се забавуваат, да изгледаат привлечно и да остават добар впечаток. И додека на мажите им е поважно да имаат многу пријатели и скапа гардероба, жените, од друга страна, ја ценат поврзаноста и грижата за другите, слободното време, поддршката од пријателите и блискоста со семејството, како и позитивниот и оптимистички поглед на животот.
За 19 проценти од младите е важен личниот развој и новите искуства, поради кои се чувствуваат автентични и креативни. Истиот процент од испитаниците, главно мажи од руралните средини, ја нагласуваат важноста да се ужива без компромиси, во моментот, со многу пријатели. Исто така, за 19 отсто од испитаниците традицијата, како и одговорноста кон семејството, заедницата и државата, како и скромноста и умереноста, се фактори кои го одредуваат нивниот начин на живот, а за нив е многу важно да се придржуваат до верата и верските обичаи.
Верата, љубовта и надежта се детерминанти за 18 отсто од испитаниците, а пред се за жените кои во текот на животот се водат од љубовта кон луѓето и работите кои сакаат да ги прават. Тие се слободни, но и одговорни и грижливи. Тие веруваат дека не се грижат доволно за исхраната, а сакаат да поминуваат време во природа.
Што им недостасува на младите?
Она што на младите најмногу им недостасува во секојдневниот живот е квалитетен сон, поздрава исхрана, почести патувања во природа и баланс помеѓу работата и слободното време, а повеќе од 65 отсто од испитаниците во последната година вовеле одредени промени во својот живот во за да водат поздрав начин на живот.
