Пред да аплицирате за работа, прво го читате огласот што вклучува непотребен сет фрази и нејасни изјави. Овие вообичаени фрази може ненамерно да откријат многу за приоритетите на компанијата, за нејзиниот идеален кандидат за работа и каков вид личност ѝ треба на таквата организација. Во продолжение прочитајте што значат најчестите фрази што ги сретнувате во огласите за работа.
1. „Динамична средина“
Оваа фраза обично значи дека има многу работа и дека работите секогаш се одвиваат брзо, под постојани кратки рокови, па затоа треба да бидете подготвени за брза работа. Ќе мора да учите брзо и да работите брзо, а вашето работно место може да биде загрозено ако не сте во можност да ги следите останатите.
2. „Самоиницијативност“
Барањето самоиницијатива може да значи дека ќе добиете многу кратка обука и дека за многу брзо време ќе мора да ја работите својата работа независно и брзо.
Ова може да се смета за црвено знаме за некој што е релативно нов во тој вид работа бидејќи нема да имате многу време да научите сè. Но, оваа работа е идеална за лидер кој има слично искуство и е подготвен да ги реализира своите идеи.
3. „Флексибилност“
Понекогаш потенцијалниот работодавец ќе каже дека сака да бидете флексибилни, но тука повеќе станува збор за компромис отколку за флексибилност. А, кога се мисли на компромис, тоа значи дека вие губите секогаш, односно дека ќе сторите што и да побараат затоа што сте флексибилни.
4. „Неограничен платен годишен одмор“
И покрај тоа што звучи одлично, оваа фраза во суштина испраќа порака дека вашите претпоставени мислат дека сте возрасни и дека ќе се однесувате соодветно, така што нема да земете еден месец одмор, особено не уште првата година.
Најдобро е да откриете колку денови одмор земаат вашите колеги, во кој дел од годината и во кој дел од годината има најмногу работа во вашиот сектор.
5. „Конкурентна плата“
Кога ќе ја видите фразата „конкурентна плата“, тоа не значи дека не можете да преговарате за вашата плата.
Ако имате повеќе искуство и ако понудите нешто што не се наоѓа често на пазарот, вашата моќ за преговарање ќе се зголеми, треба да стоите цврсто и да преговарате за подобри услови.
6. „Различни должности“
Од вас се очекува да извршувате најразлични задачи, кои генерално не се дел од вашата работа. Оваа фраза може да биде засилена со зборовите „и други задачи по потреба“ што се појавува на друго место во огласот за работа.
Ова може да се смета за црвено знаме за кандидатот кој ја цени структурата на однапред определен сет одговорности и не сака да биде затрупан со многу задачи. Но, ова може да биде идеална работа за луѓето кои сакаат динамична работа и постојани промени.
7. „Работа под притисок“
Најверојатно ќе имате многу проекти и задачи одеднаш, кратки рокови што воопшто нема да бидат реални, а раководството на компанијата е свесно за тоа и затоа бара луѓе кои можат да се справат со тоа.
Повеќето луѓе издржуваат една до две години на вакви работни места и ретко напредуваат.
За да успеете во таква средина, мора да ги прифатите несовршеностите затоа што „ќе мора да произведувате работи на просечно ниво“.
8. „Страст“
Страста не значи дека треба да бидете вистински ентузијастични за работата, но мора да се појавите на интервјуто подготвени за да ја покажете својата стручност во таа област.
Дури и ако не сте страсни за таа работи, направете истражување за да покажете дека сте многу заинтересирани за работата.
9. „Решавање проблеми“
Ако ја видите оваа фраза во оглас за работа, веројатно ќе слушнете прашања во интервјуто како „колку време ви беше потребно за да ја приспособите својата стратегија“ или кое било друго прашање што бара да го објасните процесот на решавање проблеми на работа.
Ако видите ваков вид стандардно барање, треба да предвидите кои се предизвиците со кои се соочува деловната улога за која сте аплицирале и да бидете подготвени да објасните како ќе ги решите потенцијалните проблеми.
