Цените на храната постојано растат. Цените на месото, морските плодови, месните производи, житарките и другите основни прехранбени производи, според ИРИ, компанија за истражување на пазарот со седиште во Чикаго, се зголемија за 9 отсто во 2021 година, а трендот продолжи оваа година.
Бројни познати брендови ги зголемуваат цените, а како што пишува Си-ен-ен, многумина за растот на цените на храната го обвинуваат синџирот на снабдување, актуелниот недостиг на работна сила и ковид-пандемијата.
-Многу работи всушност ја одложија реакцијата на проблемите и на нестабилноста што синџирот на снабдување ги почувствува во последните неколку месеци. Тие одложуваа што е можно подолго, а сега, во текот на следните неколку месеци, ќе ги почувствуваме последиците, вели Даг Бејкер. од ФМИ, Здружение на прехранбената индустрија.
Бројот на товарни бродови закотвени во близина на брегот на Калифорнија достигна рекордно високо ниво во јануари, при што речиси 100 сè уште чекаат на море, дури и откако пристаништата во Лос Анџелес и Лонг Бич истоварија 13 отсто повеќе контејнери во 2021 година од кога било претходно.
Трошоците за работна сила, гориво, состојки, пакување и транспорт вртоглаво растат, најмногу поради недостигот на работна сила и големата побарувачка за стоки.
Омикрон ги зголемува ценовните притисоци поради тоа што ги зафаќа работниците од магацините, преработувачките капацитети и продавниците за храна. Со помалку работници, дистрибутерите ги намалуваат испораките до некои продавници за 20 до 40 проценти, пишува Си-ен-ен.
Освен тоа, едно скорешно истражување покажа дека 37 отсто од купувачите се многу загрижени поради недостигот на храна, што го забележале кај производи како што се храната за домашни миленици и сирењето. Во моментов на светскиот пазар има проблем со снабдување со безалкохолни пијалаци затоа што на производителите им доцнат испораките на засладувачи, лименки и стакло.
И додека во Европа инфлацијата продолжува со нагорен тренд и покрај прогнозите на ЕЦБ, администрацијата на Бајден вели дека работи на ублажување на инфлацијата, обвинувајќи ги некои од најголемите преработувачи на месо дека ги зголемуваат цените само за да го зголемат профитот.
Како и да е, експертите предвидуваат повисоки цени на храната, а од глобалните трендови нема никој да остане поштеден.
Извор: slobodenpecat.mk
