Македонија има најстар возен парк во Европа, покажуваат најновите податоци од „Евростат“.
Повеќе од половина од автомобилите во земјава се стари над 10 години, а само 3% се нови, со старост до две години.
Овој податок само е одраз на нискиот стандард на живот на граѓаните и на нивната немоќ да инвестираат во квалитетен транспорт.
Возниот парк на една земја е важен индикатор за економската состојба и за развојот на населението. Според многу истражувања, со растот на приходите и стандардот на населението, во пораст се и инвестициите на граѓаните во недвижности и во движен имот, како што се патничките моторни возила.
Во развиените земји е пракса старите автомобили да се заменуваат со нови, кои се поеколошки, посигурни и поудобни.
Меѓутоа, ова не е случај и во Македонија. Според последната статистика од „Евростат“, Македонија има најмал процент на нови автомобили (3%) и најголем процент на стари автомобили (54%) од 10 до 20 години. За споредба, во ЕУ просечно 12% од автомобилите се нови, а 28% се стари од 10 до 20 години.
Ова значи дека Македонците не можат да си дозволат да купуваат нови автомобили или да ги заменуваат своите стари. Некои од причините за тоа се ниските приходи, високите трошоци за регистрација и данок на новите автомобили, поевтината понуда на половни автомобили од странство и слабата финансиска поддршка за купување на еколошки возила.
Последиците од ова се негативни за животната средина, безбедноста и за комфортот на возачите и на патниците. Старите автомобили имаат посилна емисија на штетни гасови, трошат повеќе гориво и честопати не ги исполнуваат основните стандарди за безбедност. Исто така, тие не нудат современи опции за навигација, комуникација и забава.
Експертите со коишто разговараше Денар коментираат дека е крајно време да се преземат мерки за подобрување на состојбата со возниот парк во Македонија.
Некои од можните решенија, посочуваат нашите соговорници, се намалување на даноците и трошоците за нови автомобили, стимулација на увозот на еколошки возила, забрана на увозот на премногу стари автомобили, подигнување на свеста на граѓаните за предностите од купување на нови автомобили и развој на јавниот транспорт и алтернативните начини на патување.
Во најбогатите земји во Европа просечната старост на патничките автомобили е помала од 12 години. Во Австрија, Германија, Данска, Швајцарија, Белгија и Ирска е под 10 години.
