Со својата уникатна атмосфера, празнично осветлување на плоштадот пред градското собрание, главниот божиќен пазар во Виена влезе во актуелниот рејтинг на престижниот бизнис магазин „Фајненшл тајмс“.
Виена го претставува пионерскиот град во кој првично започна да се организира Божиќниот саем како денешниот. Во 1296 година, војводата Албрехт I го започна првиот таков саем во декември.
„Како главна претпразнична атракција, божиќниот панаѓур на плоштадот пред градското собрание им дава надеж, радост и оптимизам на жителите на Виена, дури и во турбулентни времиња. Во исто време, предбожиќните возбудувања се и клучната причина за многу гости да дојдат во Виена. Да се биде меѓу најдобрите божиќни маркети во светот, според магазинот „Фајненшл тајмс“, е доказ дека квалитативниот развој на виенскиот божиќен маркет во однос на понудата на органски и локални производи беше вистинскиот чекор што дополнително ја зајакна виенската позиција како божиќна престолнина на Европа“, изјави градоначалникот на Виена Мајкл Лудвиг.
„Главната цел на стратегијата за туризам на Виена е да создаде атракции кои се привлечни и за домаќините и за гостите. Виенскиот божиќен маркет е пример за тоа, а воедно и силен економски фактор. Гостите доаѓаат не само да уживаат во градот, туку и да купат подароци за празниците. Исто така, хотелскиот сектор има корист од организирање божиќни саеми. Пред пандемијата, нето-ноќевањата во виенските сместувачки капацитети во последните два месеци од годината изнесуваа околу 200 милиони евра“, рече Петер Ханке, член на Градскиот совет за економија.
„Градскиот туризам е актуелен во текот на целата година, но последните два месеци се најфреквентни за туризам во Виена. Само во ноември и декември, Виена бележи повеќе од три милиони ноќевања. Меѓу гостите најзастапени се посетителите од Австрија, Германија, Швајцарија, Италија, Франција и Шпанија“, изјави директорот на Виенскиот туризам, Норберт Кетнер. Покрај божиќните панаѓури, на позитивниот развој на ноќевањата во декември влијае и организирањето на новогодишната прослава во центарот на градот, која беше воведена во 1990/91 година. На листата на најдобри божиќни саеми на „Фајненшл тајмс“, освен во Виена, се најдоа и во Чикаго, Сан Франциско, Сингапур, Дрезден и Талин.
