Сè повеќе занаетчии одлучуваат да се зачленат во Занаетчиската комора, каде што им се овозможува да го развиваат својот бизнис и да го заштитат своето работно место.
Дали ова е само моментален тренд или е дел од долгорочна стратегија?
Зачленувањето во Комората на занаетчии нуди неколку значајни предности:
Здравствено осигурување: Занаетчиите кои се членови на Комората имаат право на здравствено осигурување. Ова е од голема работа, особено за младите занаетчии кои сѐ уште не можат да си дозволат сами да го плаќаат здравственото осигурување.
Стаж: Зачленетите занаетчии имаат можност да го стекнат својот стаж преку Комората. Ова е важно за нивната професионална кариера и за подобрување на нивните вештини.
Право на отворање дуќан: Занаетчиите кои се членови на Комората имаат право да отворат свој дуќан. Ова е одлична можност за нив да го прошират својот бизнис и да привлечат повеќе клиенти.
Базари и саеми: Зачленетите занаетчии имаат можност да ги изложуваат своите производи на базари и саеми. Ова е одличен начин да го продадат својот производ (накит, козметика, уметност…) и да го популаризираат својот бренд.
На оваа тема Денар разговараше со 29-годишната Ивана С., скопјанка која произведува рачно изработен накит и која од неодамна е член на Комората на занаетчии.
„Засега сум многу задоволна. Освен стажот, имам и здравствено осигурување, а имам и можност да ги изложувам моите производи на базари каде што заработката е прилично добра. Во блиска иднина планирам да отворам и дуќан каде што ќе ги продавам моите рачно изработени обетки, ланчиња и прстени. Добрата работа е во тоа што не морам да отворам фирма, не морам да издавам фискална сметка, а и не морам секој месец да вршам уплата на плата. Плаќам паушал од околу 8.200 денари месечно и сѐ е како што треба“, ни раскажа Ивана.
Занаетчиската комора не само што им нуди поддршка на занаетчиите, туку и ги заштитува нивните интереси. Затоа, зачленувањето во Комората е важен чекор за секој занаетчија кој сака да го направи својот бизнис успешен и одржлив.
„Членовите немаат обврска да поднесуваат завршни сметки и немаат обврска за фискална каса. Немаат обврска за исплата на нето-плата, освен задолжителни придонеси за социјално осигурување. Ослободени се од персоналниот данок оние кои за првпат отпочнуваат сопствен бизнис, под услов да не престанат со дејноста уште 3 години. Членовите имаат можност за времено запирање со работа поради намален обем на работа, болест, реновирање, подолг годишен одмор, па за тој период мируваат и обврските за даноци и придонеси. Исто така, член на семејството може да ја врши занаетчиската дејност без исполнување на условите предвидени со Законот за вршење на занаетчиска дејност“, објаснуваат од Комората.
Оттаму велат дека занаетчиите немаат обврска да плаќаат данок на добивка.
„Казните се 10 пати пониски за сторени прекршоци отколку за ДОО и ДООЕЛ. За занаетчиите следува просто сметководство кое може да го водат сами или преку овластен сметководител по пониска цена“, додаваат од Комората на занаетчии.
