Претседателот на Србија, Александар Вучиќ, изјави дека ќе се спроведе тријажа на пациенти и дека тоа е најбрзиот начин да се запре ширењето на корона вирусот.
Вучиќ објасни дека на пациентите кои се со полесна клиничка слика ќе им биде обезбедено болничко лекување. За таа цел, ќе бидат обезбедени дополнителни кревети во Саемот во Белград, касарната и слични објекти во Србија.
Потребно е да не дојде до мешање со потешко болните пациенти. На потешко болните пациенти ќе им дадеме место на Клиниката за инфективни болести, пулмологија, болницата Драгиша Мишовиќ (која има инсталирано 106 нови респиратори), а потоа и во болницата Земун, додава Вучиќ.
Тој рече дека откако разговарал со кинески лекари, потребни се големи сали во кои лесно може да се влегува и излегува.
Со овој систем, Кина успеа да го запре корона вирусот за 29 дена.
Тријажа е добро познат термин и метод во медицината и во основа се однесува на класификација на пациентите според итноста на клиничката слика.
Примарната цел на тријажата е да се категоризираат пациентите според итност, а основниот принцип е да се користат ограничени ресурси за да можат што повеќе луѓе да имаат корист од нив. Ваквата категоризација овозможува и обезбедува соодветна и навремена проценка на сите пациенти.
