Патарините со електронски картички граѓаните ќе може да ги плаќаат за помалку од еден месец, додека целосната дигитализација на Коридорот 10 ќе биде готова за околу два месеци, најавија надлежните.
Автопатот Миладиновци – Штип, се уште е без патарини, па засега граѓаните ќе возат бесплатно.
На Коридор 8 пак, нови патарини нема да се градат, туку само ќе се надгради постоечкиот софтвер.
Сообраќајот на Коридорите ќе се следи преку Центар за контрола. Окото на целата патна инфраструктура, вака директорот за државни патишта го претстави објектот, кој е во завршна фаза. За почеток ќе ги контролира Коридорите 8 и 10, додека за една до две години ќе се поврзат и сите патишта низ земјава.
Во објектот има и посебен кол центар каде граѓаните ќе може да пријавуваат проблеми на патиштата.
Одреден период граѓаните ќе имаат можност да плаќаат и во кеш, додека заврши целата дигитализација.
