Ценејќи го значењето на шахот во развојот на најмладите, „Алкалоид“ АД Скопје опреми ново модерно катче наменето за шаховска едукација и за турнири за младите, почнувајќи од седумгодишна возраст. Станува збор за две училници во центарот на Скопје, каде што најсилните македонски велемајстори ќе работат со најмладите шахисти, во групи до 20 ученици.
Со повлекувањето на првиот потег во симултанка со ФИДЕ-мајсторот (ФМ) Моника Стојковска (македонска шампионка за 2022 година), генералниот директор и претседател на Управниот одбор на „Алкалоид“, симболично го означи почетокот на систематската работа со најмладите шаховски таленти во клубот.
Наставата во рамките на ШК Алкалоид ќе ја водат лиценцирани тренери на Светската шаховска федерација (ФИДЕ), кои се истовремено и најсилни македонски шаховски велемајстори, носители на националната репрезентација, како и освојувачи на многу турнири и шампионски титули во екипна и во поединечна конкуренција. Покрај членовите на ШК Алкалоид, овој нов шаховскиот дом, лоциран на ул. Железничка (ул. Јордан Мијалков) бр. 40 А во Скопје, ќе биде отворен за сите шахисти и љубители на шахот, кои ќе имаат можност за едукација, дружење и за одигрување турнири.
Според процената на стручните експерти и на педагозите, шахот придонесува за развој на когнитивните способности кај најмладите, ја подигнува концентрацијата при учењето, ги подобрува аналитичкото размислување, решавањето проблеми и носењето одлуки, а во голема мера овозможува и дружење и креирање тимски дух.
Шаховскиот клуб Алкалоид е основан на 26 март 1976 година и важи за еден од најдобрите европски клубови. Има огромна колекција на титули, од кои најпрестижна е освоеното злато на Европскиот клупски куп (ЕКК) во Нови Сад, Србија, во 2016 година.
Алкалоид и оваа година е дел од регионалниот саем за вработување.
