Домашните банки на своите веб-страници нудат на продажба бројни деловни објекти низ земјава – од дуќани во ГТЦ и други градови, до бензинска пумпа, казино, пекара, автосалон, фабрика за плочки и поранешни производствени сали.
На листите со имоти може да се најдат објекти со различна намена и големина, дел од нив со имотен лист, а дел без целосно решена документација. Најчесто станува збор за недвижности кои банките ги презеле поради ненаплатени кредити и сега бараат нови сопственици.
Халк банка, меѓу другото, продава бензинска пумпа во тетовско Порој, со деловен простор од 1.328 квадратни метри и земјиште од 1.646 квадратни метри. Истата банка нуди и дуќан во Градскиот трговски центар во Скопје, чија цена надминува 226 илјади евра.
Стопанска банка Скопје има на продажба деловен објект во Богданци од 961 квадратен метар, составен од аптека, супермаркет, казино и апартмани за издавање.
Комерцијална банка, пак, продава објект во скопско Орешани кој некогаш служел како фабрика за производство на плочки. Објектот е со површина од 1.529 квадратни метри, но е наведен без имотен лист.
На листите на банките се наоѓаат и дуќани во Чаирчанка, ГТЦ и Ѓорче Петров, како и пекара во Охрид, автосалон во Кочани и објекти поврзани со метална индустрија во Кичево.
Иако ваквите недвижности често се нудат по пониски цени, тие не секогаш лесно наоѓаат купувачи. Дел од нив со години стојат на списоците на банките, особено кога документацијата не е целосно решена или објектите бараат дополнителни инвестиции.
За заинтересираните купувачи, понудите се достапни на веб-страниците на банките, каде редовно се објавуваат списоци со станови, куќи, дуќани, земјишта и деловни објекти кои се продаваат.