Директорката Марија Андоновска изјави дека најголема инциденца е регистрирана кај децата од 5 до 14 години. Што се однесува до градовите, најмногу случаи се пријавени во Скопје – 716, Тетово – 339, Куманово – 150, Велес – 109, Штип – 60, Дебар – 50. Андоновска очекува пикот да биде во втората половина на овој месец.
„Имајќи го предвид периодот во кој се наоѓаме, со празници и собири, ова е нешто што се очекува. Очекуваме пикот да биде во втората половина на овој месец и првата половина на февруари, со враќањето на децата во училиштата, се очекува бројот на лица кои ќе се разболат од грип или слични заболувања да се зголеми“, изјави Марија Андоновска, директорка на ИЈЗ.
Андоновска апелираше до граѓаните кои имаат симптоми на грип да останат дома и да не одат на работа, а децата да не се испраќаат во градинки и училишта. Според неа, овие совети се дадени не само за да се спречи ширењето на вирусот, туку и за самите болни да се одморат и да останат дома.
„Институтот за јавно здравје постојано предупредува дека оние кои не се заболени треба да избегнуваат колку што е можно да бидат во простории со голем број луѓе, да избегнуваат контакт со веќе заболени лица, а оние со симптоми на кашлица да не контактираат со други луѓе и редовно да ги мијат рацете со сапун и вода“, изјави Марија Андоновска, директорка на ИЈЗ.
Во врска со одложувањето на почетокот на втората половина на учебната година, Андоновска изјави дека активностите кои сега се забележани се очекувани, но доколку се зголеми бројот на заболени пациенти, ќе дадат препораки до Министерството за образование за одложување на почетокот второто полугодие.