Села уште како дете бил вклучен во семејниот бизнис. Тоа искуство подоцна ќе стане основа за идеја која ќе прерасне во Slice – платформа која денес им помага на илјадници независни пицерии да се адаптираат на дигиталниот пазар.Приказната за Илир Села не започнува како типична стартап приказна. Таа почнува во семејна пицерија, во средина каде што бизнисот не се учи од книги, туку од секојдневна работа, од рано утро до доцна навечер.
Идејата зад Slice не била да се создаде уште една апликација за нарачка на храна, туку да се реши конкретен проблем. Голем дел од пицериите во САД се мали, семејни бизниси кои немаат ресурси да инвестираат во технологија, маркетинг или онлајн продажба. Во исто време, големите синџири инвестираат милиони во дигитални решенија и ја зголемуваат својата предност на пазарот.
Токму таа нерамнотежа била почетната точка.
Во раните фази, платформата не функционирала како што функционира денес. Села лично ги примал онлајн нарачките и ги пренесувал телефонски до рестораните, бидејќи дел од сопствениците не сакале да користат нови технологии. Со текот на времето, како што растела довербата, растела и платформата.
Денес, Slice нуди целосен систем за работа – од веб-страници и онлајн нарачки, до маркетинг и алатки за управување со клиенти. Преку оваа мрежа, платформата им овозможува на малите бизниси да функционираат како дел од поголем систем, без да ја изгубат сопствената независност. Според достапните податоци, преку платформата се генерирани над милијарда долари приходи за независни пицерии.
Иако седиштето на компанијата е во Њујорк, значаен дел од нејзиниот развој е поврзан со Македонија. Во почетоците, дел од оперативните задачи биле доверени на луѓе од земјата, а со текот на времето тоа прераснало во сериозно присуство со стотици вработени.
Оваа врска со Македонија денес е една од причините поради кои компанијата привлекува внимание на локалниот пазар на труд. За разлика од класичните контакт центри, позициите во Slice се поврзани со конкретен производ и со директно влијание врз работењето на илјадници бизниси.
Работата во ваква средина значи вклученост во систем кој функционира на глобално ниво, но истовремено е фокусиран на конкретни, секојдневни операции – нарачки, комуникација со клиенти и поддршка на партнери. За дел од вработените, токму оваа комбинација на структура и динамика е клучниот мотив.
Дополнително, присуството на јасни процеси, меѓународен тим и можности за развој ја позиционира компанијата како атрактивен работодавач, особено за луѓе со искуство во customer support и операции.
Приказната на Slice, во суштина, не е само за технологија. Таа е за трансформација на традиционален бизнис модел во дигитална средина, без да се изгуби неговата основа. И можеби токму затоа привлекува внимание – затоа што зад неа стои реално искуство, а не само идеја.
Во Македонија бизнисот изгледа вака Број на вработени 365 - 370 Просечна бруто плата 109.000 ден-Просечна нето плата 72.000,00
Во моментов се отворени работни позиции за Customer Experience Representative и Customer Experience Team Lead