За многумина што размислуваат за преселба во Европа, комбинацијата од високи приходи, ниски даноци и квалитетен живот е клучен фактор при изборот на нова дестинација. Според анализата на компанијата „Вилијам Расел“, која ги споредува земјите според даночните оптоварувања, платите и животните трошоци, една мала европска држава се наоѓа високо на листата на најпосакувани места за работа и живеење.

Станува збор за Лихтенштајн – една од најмалите држави во Европа, сместена помеѓу Австрија и Швајцарија. Иако има околу 40.000 жители, земјата располага со исклучително силна економија и висок животен стандард. Просечната нето-плата таму достигнува околу 8.250 евра месечно, што ја прави една од најатрактивните дестинации за професионалци кои бараат подобри услови за живот.

Покрај високите примања, Лихтенштајн е познат и по безбедноста, стабилноста и природните убавини. Сместен во алпскиот регион покрај реката Рајна, нуди мирна средина, чиста природа и исклучително ниско ниво на криминал.

Интересен податок е што значителен дел од работната сила доаѓа од странство. Голем број вработени секојдневно патуваат од соседните земји, особено од Германија, Австрија и Швајцарија, што покажува колку е привлечен локалниот пазар на труд.

Сепак, преселбата во оваа држава не е толку едноставна. Поради малата територија и ограничениот број жители, властите издаваат ограничен број дозволи за престој. Најголеми шанси за добивање работна и престојна дозвола имаат кандидатите кои претходно ќе обезбедат работно место кај локален работодавец.

Во моментов најбарани се кадри од областа на информатичката технологија, финансискиот сектор, инженерството и здравството, каде побарувачката за квалификувани професионалци останува висока.