Во одредени популарни туристички дестинации се воведени строги правила за обувките, а санкциите за несоодветна опрема можат да бидат исклучително високи. Ова особено се однесува на познатиот крајбрежен регион Чинкве Тере.
Туристички рај со предизвикувачки патеки
Спектакуларните пешачки патеки што ги поврзуваат живописните населби секоја година привлекуваат илјадници туристи. Сепак, многумина ја потценуваат тежината на теренот.
Стрмните искачувања, тесните премини и карпестиот терен ги прават овие рути предизвик дури и за поискусните планинари, поради што локалните власти редовно проверуваат дали посетителите носат соодветни обувки.
Апостолките на „црната листа“
Под лупа на контролите се апостолките, сандалите, влечките и сите обувки со рамен или лизгав ѓон кои не се наменети за планинарење.
Туристите кои ќе бидат затекнати во вакви обувки можат да бидат казнети, а износот на казната се движи од неколку десетици до дури 2.500 евра, во зависност од ситуацијата и проценката на надлежните служби.
Целта на овие мерки, како што истакнуваат локалните власти, не е казнување на туристите, туку намалување на бројот на несреќи и интервенции на спасувачките служби.
Сè повеќе интервенции поради неподготвени туристи
Локалните служби предупредуваат дека секоја година се бележи голем број несреќи предизвикани од несоодветна обувка.
Лизгања, падови и повреди на патеките често бараат интервенција на спасувачките екипи, особено во летната сезона кога рутите се најоптоварени.
Ова дополнително ги оптоварува службите за итна помош, кои и онака се соочуваат со голем број туристи.
Што да обуете за вакви патеки?
За планинарски и понапорни пешачки рути се препорачуваат стабилни обувки со добро прилегање и цврст зафат – планинарски чевли, трекинг-патики, trail обувки или спортски патики со квалитетен ѓон.
Клучни се стабилноста и сигурната потпора на нерамен терен.
Доколку планирате пешачење во Италија, добро е однапред да ги проверите локалните правила. Она што на фотографиите изгледа како лесна прошетка покрај море, во реалноста може да биде сериозна планинарска рута.
Ако тргнете во апостолки, наместо разгледница од Италија, дома би можеле да понесете и прилично непријатна казна.