Властите ги демантираат тврдењата за исклучоци за одредени националности, вклучително и за британските патници, нагласувајќи дека правилата важат универзално, со можност за привремено исклучување само во услови на метеж.
Но, сепак, на полицијата ќе ѝ биде дозволено повремено да ги исклучува скенерите кога ќе станат толпите преголеми ова лето, велат официјални лица, а пренесуваат медиумите во регионот.
Системот за влез и излез на ЕУ почна да се применува на грчките аеродроми и на другите гранични премини на 10 април, заменувајќи ги печатите во пасошите со биометриски податоци – фотографии и дигитални отпечатоци од прстите на патниците.
Грчките официјални лица претходно навестија дека овој систем, можеби, нема да се применува ова лето за патниците од Велика Британија, важен пазар за грчката туристичка индустрија.
Сепак, европските и грчките власти подоцна објаснија дека некористењето на овој систем е дозволено само периодично, кога одеднаш пристигнуваат голем број патници на граничниот премин и дека ова не важи за која било земја или националност.
Грчката полиција соопшти дека дигиталниот систем е „во целосна функција“ и дека ќе ги преземе сите мерки за непречен проток на посетителите, во согласност со регулативите на ЕУ.
Приватните туристички оператори предупредуваат дека дополнителните проверки би можеле да влијаат на патниците од Велика Британија и да ја намалат атрактивноста на ЕУ како дестинација.
Но, Грција го одложи воведувањето на новите правила за комплетите за прва помош во автомобилите до 1 јануари 2027 година. По тој рок, комплетите ќе мора да бидат усогласени со стандардот DIN 13164:2022, а возачите без соодветна опрема ќе бидат казнети со 30 евра.