Замислете дека ви треба кеш – веднаш. Наместо да шетате по градот и да барате банкомат од вашата банка, едноставно застанувате на првиот што ќе го видите. Подигате пари, не плаќате ни денар провизија – и продолжувате со денот.
Ова наскоро ќе биде реалност за сите граѓани. Планот на Народната банка е до крајот на 2026 година да воведе национална мрежа на банкомати, која ќе ви овозможи четири бесплатни подигнувања месечно од било кој банкомат, со лимит од 2.000 денари по трансакција.
Причината за оваа промена е едноставна – недоволен број банкомати и нивна нерамномерна распределба низ државата. Со новата мрежа, секој ќе има подеднаков пристап до готовина, без разлика од која банка е издадена неговата картичка.
Кешот не излегува од мода
Иако дигиталните плаќања се сè поприсутни, кешот сè уште има важна улога. „Препорачливо е дома да се има готовина за основните потреби за период од барем неколку дена до недела“, вели гувернерот Трајко Славески. За многумина, анонимноста и слободата што ја нуди готовината се нешто непроценливо.
Како тоа функционира во други земји
Во Хрватска, граѓаните имаат две бесплатни подигнувања месечно од било кој банкомат, а по формирањето национална мрежа – нема да има ограничувања.
Во Србија, Пошта Србије нуди подигнување кеш без провизија со најпознатите картички.
Во Грција, бесплатните трансакции важат за банкомати во DIAS-системот, а за другите провизијата е до 1,5 евра.
Во БиХ, „БХ Мрежата“ нуди пристап до над 220 банкомати без провизија.
Во Финска, Otto мрежата обезбедува бесплатни подигнувања за сите домашни картички, а во Германија, Cash Group поврзува над 7.000 банкомати на четири големи банки.
Што значи за нас
Кога оваа мрежа ќе заживее, првиот АТМ што ќе го видите ќе ви биде доволен. Со четири бесплатни трансакции месечно, ќе заштедите и време и пари, а кешот ќе ви биде секогаш на дофат.