Македонците трошат повеќе од третина од буџетот за храна – веднаш зад Албанија на Балканот
Додека просечно европско семејство троши околу 12% од својот буџет за храна, во Македонија овој удел достигнува дури 36,8%, што ја става земјата меѓу европските држави каде храната најмногу го оптоварува семејниот буџет. Според анализите на трошоците на домаќинствата во Европа и регионот, само Албанија има повисок удел – 44,1%.
Податоците покажуваат дека земјите од Западен Балкан значително поголем дел од приходите ги насочуваат кон основни животни потреби отколку граѓаните на Европската Унија. По Албанија и Македонија следуваат Косово со 34,1%, додека во Црна Гора и Босна и Херцеговина храната учествува со околу една четвртина од вкупните трошоци на домаќинствата. (
Интересно е што македонските семејства се и меѓу најголемите потрошувачи на облека и обувки во регионот. За оваа намена издвојуваат 5,3% од буџетот, што е повеќе од просекот на Европската Унија од 4,9%.
Од друга страна, за забава и култура Македонците трошат само 1,9% од домашниот буџет, што е повеќе од четири пати помалку од европскиот просек од 8,5%. Овој податок покажува дека поголемиот дел од приходите завршуваат за покривање на основните животни потреби, оставајќи мал простор за патувања, културни настани и рекреација.
Економистите предупредуваат дека колку е поголем уделот на храната во семејниот буџет, толку е понизок животниот стандард. Во развиените европски земји најголемиот дел од трошоците се насочени кон домување, транспорт, забава и услуги, додека на Балканот храната и понатаму останува најголемиот месечен расход.
Факт: Просечно семејство во ЕУ троши околу 12% за храна, а македонско семејство дури 36,8% – три пати повеќе. (Balkanweb)