Дискусијата започнала во популарна Фејсбук група за чистачки и собарки, каде што таа објаснила дека добила понуда да работи за 900 евра месечно, со обврска да исчисти дури 20 апартмани дневно.
– Дали е нормално да ти понудат плата од 900 евра за работа како собарка, со обврска да исчистиш 20 апартмани дневно? Ова ми е прва сезона, не знам, но ми изгледа многу малку – напишала таа.
Нејзината објава предизвикала лавина реакции, а голем дел од коментарите биле критички кон ваквата понуда.
– Кажи им сами да чистат, па и тие 900 евра ќе им останат – напишала една од учесничките во дискусијата.
Друга била уште подиректна:
– Кој работи за 900 евра? Ништо под 1.500 евра и максимум седум апартмани дневно.
„20 апартмани дневно е невозможно“
Многумина во групата посочиле дека 20 апартмани дневно се нереална задача за една личност.
– Во осум часа може квалитетно да се исчистат шест или седум апартмани, зависно од нивната големина и бројот на кревети. Дваесет е невозможно – напишала една чистачка.
Според искуствата на други членови, дури и пет апартмани дневно често е максимум за една личност, особено кога има честа промена на гости.
– Најмногу што сум исчистила во еден ден се пет апартмани. Ако има повеќе смени на гости, потребна е помош. За 20 апартмани би биле потребни најмалку три или четири лица – посочила друга учесничка во расправата.
Колку би била реална плата
Според дел од коментарите, реалната сезонска плата за работа како собарка треба да биде најмалку 1.500 евра, а во понудата би требало да бидат вклучени и обезбеден сместување и оброк.
Дебатата повторно го отвори прашањето за условите и вреднувањето на сезонската работа во туризмот, особено во период кога побарувачката за работници во туристичките региони е сè поголема.