Имате заштедени 1.000 евра, каде да ги инвестирате, што се исплаќа најмногу, каде ризикот е минимален. Ова се прашања што многумина ги поставуваат. Покрај граѓаните на Македонија, кои сеуште веруваат во штедење под перница, има и такви кои сакаат да инвестираат на подолг период, со одреден ризик, но и со шанса да заработат.
Преку ноќ, тешко може да се стане експерт за купување акции или инвестирање во виртуелни валути. Сепак, постојат одредени параметри за проценка на ризикот и потенцијалот за заработка што ви ги откриваме. Кои се предностите и недостатоците на инвестирање пари во банка, а кои во државни обврзници, тргување со акции или злато на берза или биткоини?
Државните обврзници и орочените депозити во банката се многу сигурна форма на штедење, купувањето акции е секако највозбудливото, но со висок ризик, а инвестирањето во биткоини е слично на коцкање.
Ако, на пример, сте заштедиле 1.000 евра што сакате да ги инвестирате за дополнителен приход, тоа можете да го направите на неколку начини.
Дигитални валути
Биткоинот е виртуелна валута па како и се виртуелно во животот, е изложен на голем ризик.
Заработката од биткоин за една година е можна, и може да биде значајна, но не може да се знае колкав е тој процент. Оваа инвестиција носи висок ризик не само за губење на заработката, туку и за дел од главнината. Инвестирањето во биткоин е како играње во казино.
Ако инвестиравте 1.000 евра во оваа виртуелна валута во септември 2020 година, чија цена тогаш беше 11.000 долари, сега, една година подоцна, би имале четири пати повеќе од тоа колку што биткоинот пораснал оттогаш, бидејќи денес е рекордни 47.000 долари. Меѓутоа, од септември 2019 година (биткоинот тогаш чинеше 10.000 американски долари) до септември 2020 година, цената на оваа виртуелна валута се зголеми за само 1.000 долари, така што ќе заработевте само сто евра со инвестирање во неа.
Штедење во банка
Парите во банката можат да бидат депонирани во странска валута или денари. Ова е многу сигурен тип на заштеда бидејќи носи со себе високо ниво на сигурност, но затоа приносите се релативно мали – тие се движат до три проценти, во зависност од рочноста или валутата.
Ако орочите пари во денари на една година, каматната стапка во банките се движи помеѓу 1 и 3 проценти, а ако депонирате пари во странска валута, каматната стапка е значително помала, и се движи до еден процент. Оваа информација е достапна на официјалните веб-страници на нашите банки. Така што, доколку сакате да орочите 1.000 евра во денари, во банка што дава камата од три проценти, можете да заработите 30 евра во денари за една година. Од друга страна, ако штедите во евра, ќе заработите само 10 евра за една година.
Државни обврзници
Еден од најсигурните видови на штедење е купувањето на државни обврзници во денари или во странска валута. Државните хартии од вредност се многу сигурни од аспект на ризик, но приносите се мали, и тие се движат од 0,75 до 3 проценти камата, во зависност од рочноста.
За период, на пример, една година, каматната стапка е околу 0,75 проценти. За сума од 1.000 евра ќе заработите само 7,5 евра, но тоа е загарантирано.
Инвестирањето во акции на берзата носи поголема доза на ризик и колку е пократок рокот за кој се инвестира во акции, толку е поголем ризикот. Ако инвестираме на една година, нивото на ризик е зголемено во споредба со, на пример, инвестирање пари за пет години.
Доколку се купат акции, мудро е да се купат акции на некои од нашите реномирани компании, каде што има мали шанси да се случи нешто лошо.
Некои компании исплаќаат и годишни дивиденди, а приносите зависат од успехот на бизнисот на компанијата и се движат од еден па и до десет проценти на годишно ниво. Така, заработката за инвестирани 1.000 евра на овој начин може да оди од 10 до 100 евра годишно. Тука може да се постигне и раст на капиталот, како дополнителна заработка која секако не е загарантирана.
Странски берзи
Нашите граѓани можат да инвестираат пари и на светските берзи, во акции на реномирани компании.
Дивидендите на тие компании се од два до четири проценти на годишно ниво, иако зависат од деловните резултати на самата компанија, но неблагодарно е да се даваат прогнози за раст на капиталот.
Така што, со инвестирање 1.000 евра во акции на странски компании, може да се заработат помеѓу 20 и 40 евра за период од една година! Имајќи предвид дека реномираните светски компании се економски посилни од многу земји, постои ризик на краток рок, но нема ризик на долг рок. Значителен профит може да се оствари за три до пет години, а ризикот е мал.
Берзанско злато
Цената на златото скокна во последните две години, така што денес се движи помеѓу 1.750 до 1.800 долари за унца.
Не се препорачува купување на злато за оние кои сакаат да депонираат пари на една година бидејќи златото веќе достигна значајно ниво на цена. Меѓутоа, дури и ако некој планира да формира заштеди за подолг период, 10 до 20 години, тогаш златото е многу интересна инвестиција. Златото сега е изложено на ризик од мал пад, и најверојатно нема да скокне наскоро.
Во пракса, сето ова значи дека ако пред една година, во септември 2020 година, кога златото на берзата чинеше 1.947 долари за унца, инвестиравте 1.000 евра, сега би имале загуба од 75 евра, бидејќи цената на берзата падна за 7,5 проценти, бидејќи унца сега чини 1.833 долари.
Но, доколку сте инвестирале иста сума во септември 2019 година (унца злато чинела 1.515 долари), би заработиле 300 евра за една година, бидејќи цената на златото се зголеми за 30 проценти во тој период.
