Пандемијата во голема мера ги промени работните навики. Се повеќе компании се селат на работа од дома, а некои воведоа и четиридневна работна недела.
Наместо пет, тие работат четири дена во неделата, но десет часа дневно.
Хрватската компанија „Logic matrix“ работи четири дена неделно по десет часа, а тоа го работи повеќе од три години, јавува ХРТ. За Дино Галиновиќ ова не е новост, но првпат тоа го прави кај хрватски работодавец.
„За жал, малкумина мои познаници, колеги, можат да кажат дека се соочиле со такво нешто, па дури и да предложат такво нешто, тоа е нешто што не е прифатено од работодавците, тие се уште се многу скептични или толку голема потреба за контрола, стравот дека ефикасноста автоматски ќе се намали“, вели Галиновиќ, советник за европски политики и проекти за заштита на животната средина и одржлив развој во компанијата.
Но, искуството во нивниот случај го покажаува токму спротивното.
„Покрај поголемото задоволство, се покажа дека годината во која воведовме четиридневна работна недела беше за 45 проценти поуспешна од претходната година“, вели Маја Кириниќ, раководител на Одделот за стратешко планирање и подготовка на проекти на ЕУ.
Сепак, има многу сектори во кои таква организација на работата не е можна. На пример, во земјоделството, каде работната недела трае седум дена и така во текот на целата година. Исто така, во конфекција или градежништво е тешко изводливо.
„И секогаш е прашањето дали ќе може да се одмори од прекумерната работа за четири дена за дополнителен слободен ден“, рече Крешимир Север, претседател на Независните хрватски синдикати.
„Во земјите како Хрватска, ми се чини дека ни треба повеќе работа, не можеме да постигнеме со повеќе слободно време сè што треба да постигнеме и да излеземе и да ги достигнеме земјите пред нас“, вели Дамир Зориќ, директор на хрватскиот Здружение на работодавачи.
Работниците имаат различни мислења: „Одлично, 10 часа, два часа повеќе од вообичаеното, но четири дена, а потоа си дома три дена.“ „Не, јас многу претпочитам пет дена до осум часа, па дури и пократко“.
И додека порано работевме осум часа, осум одмаравме и спиевме осум, денес работиме и од дома, а работното време е прилагодено. Најважно е да не се намали ефикасноста и вработениот да биде задоволен од работното време, но и од платата, пренесува ХРТ.
