И официјално, мора да се штеди. Како што е најавено, така е и направено.
Клима уредите „се заклучија”. Временските прилики ги олеснија работите. Нема жештини, оти, во спротивно, клима уредот ќе беше програмиран на 27 степени. И, ако, некаде околу 15 октомври кога е првата ревизија на штедењето, сметките не се пониски за 15 проценти, ќе има и казни.
Ерата на официјалното штедење стигна по летните одмори. Септември, и досега жежок и тежог најдолг месец, е уште понапнат. На граѓаните им стигнаа и детални совети – што и како може да штедат. Па дури и за готвењето. Што и колку се троши.
Тоа е во ред, велат граѓаните. Секое домаќинство, во принцип, сака што помалку да потроши електрична енергија. Одамна е почната трката по огревно дрво.Ама граѓаните велат – што правиме со загадувањето на околината?
Голем број домаќинства поставија сончеви панели. Барем бојлерот да не троши струја. Други, плинот го користат и за готвење. А зготвен ручек во рерна, на шега велат, може да има само во недела. Во ред е ако свети една, наместо три светилки. Секој се раководи од длабочината на џебот. Како и да е, секојдневието се претвори во сметки и пресметки на трошењето. Не дека досега ги немаше. Ама, кризата и скапата електрична енергија, сите се согласуваат подолго време „ќе не тресе”. Потрошените киловати станаа мерило за живеење.
