Туристичката сезона во Грција ќе започне на 15 јуни со отворање на хотелите, додека директните меѓународни летови до грчките дестинации постепено ќе се обновуваат од 1 јули, рече премиерот Киријакос Мицотакис.
Во телевизиското обраќање до нацијата, Мицотакис рече дека Грција „успеала да го ограничи ширењето на коронавирусот“ и дека нејзиниот одговор на здравствената криза е „пример што треба да се следи“.
Неговата влада воведе забрана за движење поради вирусот доста рано и избегна голем број на заразени и починати од COVID-19.
Сепак, рестриктивните мерки нанесоа сериозен удар на грчката економија, особено врз туризмот, кој создава над 10% од бруто-домашниот производ на земјата.
Минатата година повеќе од 34 милиони туристи ја посетија Грција, трошејќи 18,2 милијарди евра, според официјалните податоци.
Ајде да се соочиме со реалноста храбро: туризмот ја достигна својата најниска точка во април и мај. Значи, што и да постигнеме оваа година ќе биде од корист, рече Мицотакис.
Мицотакис најави петмесечно намалување на даноците во сообраќајот од 24 на 13 проценти, што ќе доведе до поевтини билети за брод, автобуси и авиони за време на туристичката сезона, како и намалување на даноците на кафе, безалкохолни пијалоци и билети за кино на отворено.
Коронавирусот во Грција е потврден кај 2.850 лица, од кои 166 починале.
