Една од најпознатите работни практики во Германија – осумчасовниот работен ден – би можела да претрпи значајни измени. Владината коалиција подготвува реформа на Законот за работно време, со која фокусот би се префрлил од дневно на неделно пресметување на работните часови.

Според предлогот, наместо строго ограничување на бројот на часови што може да се работат во текот на еден ден, ќе се следи вкупниот број работни часови во рамки на целата работна недела. Деталите за новиот модел сè уште се предмет на разговори со синдикатите и работодавачите.

Постојниот систем е во сила повеќе од еден век. Германското законодавство предвидува работниот ден да трае најмногу осум часа, а само во одредени случаи е дозволено продолжување до десет часа.

Предлогот веќе предизвика поделени реакции. Работничките организации предупредуваат дека ваквите промени би можеле да доведат до слабеење на заштитата на вработените и зголемување на притисокот врз работната сила.

Од друга страна, претставниците на работодавачите сметаат дека станува збор за модернизација на застарен систем. Тие нагласуваат дека целта не е воведување подолги смени, туку поголема флексибилност за компаниите и за вработените во услови на дигитална економија и променлив пазар на труд.

Дополнителен аргумент за реформите е и недостигот на работна сила, кој станува сè поголем предизвик за германската економија. Според работодавачите, земјата ќе мора поефикасно да ги организира работните процеси за да се справи со демографските промени и стареењето на населението.

Паралелно со оваа иницијатива, се отвора и дебата за можни измени во прописите што ја регулираат заштитата од отказ, со цел компаниите полесно да се приспособуваат на пазарните услови.

Синдикатите, пак, остануваат цврсто против ваквите идеи. Тие предупредуваат дека работничките права стекнувани со децении не смеат да бидат доведени во прашање и сметаат дека предложените измени носат повеќе ризици отколку придобивки за вработените.

Предлог-законот се очекува наскоро да се најде пред германските пратеници, по што ќе следи нова фаза од дебатата за иднината на работното време во најголемата европска економија.