Системот официјално почнал со оперативна работа во саботата, на 28 март, и е поврзан со државните дигитални сервиси, па известувањата за прекршоците се испраќаат преку платформата gov.gr и апликацијата Gov.gr Wallet. Наместо класичната практика со долго чекање и рачна обработка, прекршокот сега се евидентира, се обработува и стигнува до возачот значително побрзо.
Во пилот-фазата камерите се поставени на осум ризични точки во Атика, а дополнителен надзор има и преку камери во десет автобуси, со цел да се следи и незаконското движење во лентите за јавен превоз. Најчесто регистрираните прекршоци досега се минување на црвено светло и неносење кацига кај мотоциклисти, но системот може да бележи и пречекорување на брзина, користење мобилен телефон при возење, неносење појас, како и движење или запирање во автобуски ленти.
Технологијата работи со автоматско препознавање на регистарски таблички и алгоритамска анализа, преку која се утврдува видот на прекршокот, а надлежните институции потоа можат да проверат и дали возилото е осигурено, дали има технички преглед и дали ги има подмирено обврските за учество во сообраќајот. Грчките власти уште лани најавија дека ова не треба да остане ограничено само на пилот-проект, туку да прерасне во поширока мрежа низ Атика и на национално ниво.
Пораката од Атина е јасна: дигиталниот надзор веќе не е најава, туку пракса. И таму, како и во други европски градови, безбедноста во сообраќајот сè повеќе се врзува со автоматизирана контрола, брза обработка на податоци и казни што не чекаат службеник на шалтер.